ښځې او ټاکنې کنفرانس، دوی څه غواړي؟

د انځور حقوق BBCPashto.com
Image caption په دې کنفرانس کې د ۲۳ ولایتونو نژدې ۲۰۰ مېرمنو ګډون کړی و.

افغانستان کې د مېرمنو حقونو فعالانې وايي، غواړي د ولسمشرۍ مقام له کاندیدانو سره د یوې غونډې بهیر کې د هغو ستونزو او خنډونو په باب بحث وکړي، چې د دغه هېواد ټاکنو بهیر کې ورسره مېرمنې مخامخ دي.

کابل کې د افغانستان له لر او بره راغلې سلګونه مېرمنې د یوه دوې ورځني کنفرانس بهیر کې د ټاکنو خپلواک کمېسیون، افغان حکومت او ملګرو ملتونو له استازو سره هم دټاکنو بهیر کې د خپلو اندېښنو او وړاندیزونو په اړه غږیږي.

انځورونه وګورئ

کابل کې زموږ همکار نور محمد سعید دغه کنفرانس ته ورغلی او دغه راپور یې پرې چمتو کړی دی:

کابل کې د ښځې او ټاکنې، تر سر لیک لاندې دوې ورځني ملي کنفرانس ګډونوالې مېرمنې وايي د غونډې موخه یې د ولسمشرۍ کاندیدانو سره د هغوی تګلارو کې د مېرمنو ونډې په اړه او په ځانکړې توګه ټاکنو بهیر کې د ښځو رول په اړه بحث کول دی.

د غونډې ګډونوالې وايي پلازمېنې کابل نه د ښځو حقونو فعالانو، چارواکو او د سولې عالي شورا غړو مېرمنو ترڅنګ یې د افغانستان له ۲۳ ولایتونو نه تر ۲۰۰ پورې مېرمنو په غونډه کې ګډون کړی.

دوی وايي له دې مخکې یې هم د هېواد په لر او بر کې ورته غونډې جوړې کړې، خو وايي اوس غواړي د لرې پرتو سیمو اوسېدونکې مېرمنې د ولسمشرۍ له کاندیدانو سره په یوه ځای د اړوندو مسایلو په اړه بحث وکړي.

د یاد کنفرانس اداري پلاوي یوې غړې هوسۍ وردګ په وینا د دوی کارې ډلې به د دوو مهمو موضوعاتو په اړه له غور وروسته د راتلونکي لپاره پلان جوړوي.

مېرمن وردګ وايي د ټاکنو بهیر کې د امنیتي اندېښنو تر څنګ په یو شمېر ولایتونو کې داسې هم شوي، چې نارینه وو د ښځو په نوم د رایو کارتونه تر لاسه کړي او دوی به د دغې غونډې بهیر کې د ټاکنو خپلواک کمېسیون او افغانستان کې د ملګرو ملتونو له استازو سره په دې اړه وغږيږي.

دغه کنفرانس ته له پکتیا نه یوه راغلې فعاله امینه وايي، د ټاکنو بهیر کې د امنیت ستونزه، د ټاکنو مرکزونو لږوالی او دغه راز د عامه پوهاوي لږوالی د هېواد په کچه اندېښمنونکې ستونزې دي، خو وايي خوشحاله ده، چې لږ تر لږه غږ یې اورېدل کېږي.

افغانستان کې له دې مخکې هم د ټاکنو کمپاین او رایې کارونې بهیر کې د امنیتي ستونزو او یو شمېر نورو خنډونو له کبله د مېرمنو د ګډون کچې په باب اندېښنې راپورته شوې.

خو دې سره د ولسمشرۍ یو شمېر کاندیدان بیا د خپلو ټاکنیزو منډو ترړو په بهیر کې وايي چې ټاکنو کې د بریالیتوب په صورت کې به حکومتدارۍ چارو کې او دغه راز د ژوند نورو برخو کې د مېرمنو ونډه ډېره کړي.

ورته مطالب