امریکا وایي پر پاکستان ډرون بريدونه کموي

د انځور حقوق Getty
Image caption په پاکستان کې د امریکا د بې پیلوټه الوتکو بریدونو مخالفت زیات دی

د امریکایی چارواکو په وینا له پاکستانه تر غوښتنې وروسته به پر دغه هېواد هوایي بریدونه بیخي راکم کړي.

دا غوښتنه د پاکستان حکومت ځکه له امریکا کړې چې له پاکستاني طالبانو سره د سولې خبرې اترې پیلوي.

د واشنګټن پوست د ورځپاڼې په لیکنه، یوه امریکايي چارواکي وويل د بارک اوبامه ادارې څرګنده کړې چې یوازې به د القاعدې په جګ پوړو چارواکو بریدونه کوي .

نوموړي زیاته کړه د بې پیلوټه الوتکو بریدونه به هغه مهال هم کېږي که امریکایی وګړو ته خطر وي.

امریکا له ډسمبر راهیسې په پاکستان بریدونه نه دي کړي او دا د سي.آی.اې له لوري د بې پيلوټه الوتکو په بریدونو کې لوی ځنډ دی.

د امریکا په باور دا ځنډ په پاکستان کې سیاسي حساسیتونو ته په پام سره رامنځ ته شوی دی.

تر دې وړاندې هم په ۲۰۱۱کال کې د امریکا په بې پيلوټه الوتکو کې دوه نیمې میاشتې ځنډ راغی. هغه مهال د افغانستان پولې ته نېږدې امریکایي بې پيلوټه الوتکې په تېروتنه ۲۴ پاکستاني سرتېري ووژل.

اوسنی ځنډ د نوومبر تر بریده وروسته راځي چې د پاکستاني طالبانو مشر حکیم الله مسود په ډرون بريد کې ووژل شو.

دا برید یوازې تر هغه څو شپې وروسته وشو چې د سولې خبرې اترې پیلېدې.

د پاکستان صدراعظم نواز شریف امریکا تورنه کړه چې د سولې خبرې اترې نا کاموي او طالبانو هم له خبرو اترو سره پرېکون وکړ.

تر هغه وروسته د اوباما ادارې له ښاغلي شریف سره د اړیکو د ښه کولو هڅې وکړې. د واشنګټن ادارې په هېواد کې د جدي ستونزو د هواري او په سیمه کې د هغه له سوله ییزو هڅو ملاتړ وکړ.

د واشنګټن پوست په لیکنه د اوباما ادارې یوه لوړ پوړي چارواکي دا ادعا رد کړه چې ګواکې له پاکستان سره غیر رسمي کتنې شوې دي.

نوموړي زیاته کړه له طالبانو سره د خبرو اترو مسله د پاکستان د حکومت خپله پرېکړه ده. د دغه چارواکي په وینا واشګنټن له ترهګرو سره جګړې ته دوام ورکوي.

هغه ګواښونه چې له افغان جګړې رامخې ته کېږي، که هغه د افغانستان د ننه دي او که بهر موږ به ور سره جنګېږو او له منځه به یې وړو.

ورته مطالب