کابل کې ځانمرګي بريد شپږ پوليس وژلي

Image caption ښاغلی صديقي وايي په دغه بريد کې څلور پوليس وژل شوي

د افغانستان د کورنيو چارو وزارت وايي په پلازمېنه کابل کې د کورنيو چارو وزارت ته څېرمه د پېژنتون رياست د دروازې په خوله کې ځانمرګی بريد شوی.

افغان چارواکو بي بي سي ته وويل د ځانمرګي بريد په پايله کې لږترلږه شپږ پوليس وژل شوي دي.

دغه بريد نن ماسپښين مهال وشو او له امله يې څلور پوليس ټپيان شوي هم دي.

د کورنيو چارو وزارت وايي ځانمرګي د امنيتي ځواکونو يونيفورم اغوستی و.

د دغه وزارت ویاند صدیق صدیقي وايي، بریدګر غوښتل چې له دروازې تېر شي، خو د امنیتي کسانو له شکمنېدو وروسته یې هدف ته تر رسېدو وړاندې ځان ته چاودنه ورکړې ده.

وسله والو طالبانو د دغه برید مسولیت منلی او د ګڼې مرګ ژوبلې اړولو ادعا کوي.

تر دې وړاندې وسله والو طالبانو په پلازمېنه کابل کې د ټاکنو د خپلواک کمېسيون په مرکزي دفتر او دغه په يوه ساحوي دفتر ډله ييز بريدونه کړي وو.

د ټاکنو په مرکزي دفتر له بريد يوه ورځ وړاندې وسله والو پر يوې بهرنۍ نادولتي ادارې هم بريد وکړ، چې له امله يې يوه ۱۶ کلنه نجلۍ ووژل شوه.

ورته مطالب