کونړ کې څارګرې الوتکې پنځه وسله وال وژلي

بې پیلوټه الوتکه د انځور حقوق Getty
Image caption کونړ کې بې پیلوټه الوتکې ډېرې شوې.

د افغانستان ختيځ کونړ ولایت ناړۍ ولسوالۍ کې څارګرې الوتکې وسله وال په نښه کړي دي.

د کونړ امنیه قومندان عبدالحبیب سیدخېل ویلي، په برید کې پنځه وسله وال وژل شوي او درې نور ټپیان دي.

سیدخېلي برید د پنجشنبې په ورځ غرمه مهال شاوخوا ۱۲ بجې د ناړۍ ولسوالۍ په ځنګربوشه سیمه کې شوی.

د برید سیمه یوه غرنۍ منطقه ده.

سیدخیلي وايي، په برید کې ټول وژل شوي او ټپیان وسله وال دي، او هېڅ کوم ولسي وګړی په کې نه شته.

وړمه ورځ د کونړ په مروره ولسوالۍ کې هم بې پیلوټه الوتکې برید کړی و، چې د سیمه ییزو چارواکو په وینا ځینې وسله وال په کې وژل شوي وو.

په کونړ کې د بي بي سي خبریال نعمت الله کریاب وايي، د کونړ خلک وايي، چې اوس مهال کونړ کې تربل هر وخت بې پیلوټه الوتکو ډېرې شوې دي.

دوه ورځې وړاندې، د کونړ څنګلوري نورستان ولایت کامدېش ولسوالۍ کې ورته بریدونه شوي وو، چې یو شمېر وسله وال یې وژلي وو.

د تېر کال سپتمبر کې د ناټو څارګرې الوتکې شپاړس کسان وژلي وو، چې ښځې او ماشومان هم پکې وو.

ورته مطالب