تخار کې ځمکې ښوېیدو د درو کسانو ژوند اخیستی

Image caption دا پېښه د چاه اب ولسوالۍ په ذکراباد سېمه کې پېښه شوې

افغانستان شمالي ولایت تخار کې د ځمکې ښوېيدو له امله درې کسان وژل شوي.

په تخار ولایت کې سیمه ییزو چارواکو ویلي، د ځمکې ښوېیدو له امله په دغه ولایت کې لسګونه کورنۍ خپلو کورونو پرېښودو ته اړ شوي.

د تخار والي ویاند سنت الله وویل، د ځمکې ښوېدلو پېښه تېره شپه د چاه اب ولسوالۍ په ذکر اباد سيمه کې شوې.

د هغه په وینا، د دغې پېښې په پایله کې یو کور په بشپړ ډول له خاورو لاندې شوی چې درې کسه په کې وژل شوي او درې نور ټپیان دي.

هغه زیاته کړه چې د دغې سیمې نور اوسېدونکي له خپلو کورونو وتلي او امن ځای ته لېږدول شوي دي.

د تخار د والي ویاند وویل، له بې ځایه شوو سره مرستې دغې سیمې ته رسېدلې دي.

دا لومړی ځل نه دی چې په تخار ولایت کې د ځمکې ښویدنې پېښه رامنځ ته کیږي.

د روان کال په لومړیو کې هم د دې ولایت په رستاق او کلفګان ولسوالیو کې دا ډول پېښې را منځ ته شوې وې چې له امله یې لسګونه کورنۍ بې ځایه شوې او مالي زیانونه وراوښتي وو.

ورته مطالب