د ولسمشرۍ کاندیدان یوې پرېکړې ته نژدې شوي

د ټولو رایو بیا ارزونه څو ورځې مخکې ختمه شوې،‌ خو کاندیدان لاهم پر یوې واحدې پرېکړې سره نه دي سلا شوي.

د عکس سرچینه، AFP

د عکس تشریح،

د ټولو رایو بیا ارزونه څو ورځې مخکې ختمه شوې،‌ خو کاندیدان لاهم پر یوې واحدې پرېکړې سره نه دي سلا شوي.

د افغانستان د ولسمشریزو ټاکنو د دواړو نوماندانو ترمنځ د ملي یووالي د حکومت جوړولو پر سر بحثونه د یکشنبې په ورځ‌ یوځل بیا له سره پیل شوي دي.‌

د اشرف غني احمدزي په مشرۍ د تحول او تداوم ټیم او د عبدالله عبدالله په مشرۍ د اصلاحاتو او همګرايي ټیم و وايي، لاهم د ملي یووالي د حکومت جوړولو پرسر د دواړو کاندیدانو ترمنځ‌ اختلاف نه دی حل شوی،‌ خو دواړې غاړې هڅه کوي چې دغه اختلاف ژر له منځه ولاړ شي.

د عبدالله ټاکنیزې ډلې غړی فضل رحمن اوریا وايي، دواړه کاندیدان دا مهال پر هغو خبرو بوخت دي، چې د اختلافي موضوعاتو لپاره حل لاره ولټوي.

ښاغلي اوریا وویل،‌ کاندیدانو نن د یکشنبې په ورځ له ماسپښین وروسته خبرې یوځل بیا پیل کړې.‌

خو د تحول او تداوم ټیم ویاند فیض الله ذکي بي بي سي ته وویل، له هر ځل کتنې وروسته پرمختګ شوی، ددواړو ټیمونو طرحې او نظریات د خبرو بحث کې مطرح شوي او هڅه دا ده چې د ملي يووالي حکومت جوړولو لپاره دواړه ټیمونه سره نژدې شي:‌

''لیرې نه ده چې په نژدې ورځو یا ان څو ساعتونو کې به ډېرې پرېکړې نهايي شي.''

د دواړو کاندیدانو ترمنځ‌ د اختلاف لوی ټکی د اجراییوي مشر د واکونو پرسر دی،‌ چې د عبدالله ډله وايي، اجراییوي مشر باید د کابینې مشر هم وي، خو د اشرف غني ټاکنیز ټیم دا کار د اساسي قانون خلاف بولي.

نه بدلېدونکی دریځ‌

د اشرف غني ویاند د تازه خبرو په اړه ډېر جزییات ورنه کړل، خو وویل چې د اساسي قانو د تطبیق په تړاو یې دریځ‌ نه بدلېدونکی دی،‌ چې دواړه غاړې باید د اساسي قانون په رڼا کې یوې موافقې ته ورسېږي.‌

د عبدالله ټاکنیزه ‌ډله بیا د دواړو ډلو ترمنځ د وړاندې شویو طرحو خبره کوي او وايي ځینې اختلافونه حل شوي، خو پر څلورو اختلافونو لاهم د نظر اختلاف موجود دی.‌

فضل رحمن اوریا دغه درې اختلافي مسائل یاد نه کړل،‌ خو ټینګار یې دا و کله چې دغه اختلافات په بشپړ ډول حل شي، دواړه ټیمونه به یو ګډ پرېکړه لیک لاسلیک کړي.

د عکس سرچینه، AFP

د عکس تشریح،

اشرف غني احمدزی او عبدالله عبدالله د اجراییوي مشر د واکونو پر سر اختلاف لري.

وروسته تر هغه چې د افغان ټاکنیزې لانجې له کبله د امریکا د بهرنیو چارو د وزیر جان کیري پښې دوه ځلې تر کابله وڅکول شوې،‌ د ټولو رایو د ارزونې او د ملي یووالي د حکومت جوړولو موضوع ګانې دواړو کاندیدانو ته وړاندې شوې.‌

خو په وروستیو کې ټاکنیزې لانجې ددې لامل شوې،‌ چې د ملګرو ملتونو یو جګپوړی چارواکی افغانستان ته په سفر کولو او له دواړو کاندیدانو سره کتلو ته اړ شو.‌

حامد کرزي له دواړو کاندیدانو سره په جلا جلا کتنو کې د ټاکنیزې لانجې د غوڅولو غوښتنه کړې او د عالمانو شورا هم هېواد له اوسني کړکېچه د وتلو لپاره د دواړو کاندیدانو موافقه اړینه بللې وه.‌