ننګرهار: د طالبانو د ګواښ له امله ۲۸ ښوونځي تړل شوي

د انځور حقوق epa
Image caption ځايي رسنيو راپور ورکړی، چې طالبانو د ۲۰ ښوونځيو دروازې د ښوونکو او زده کوونکو پر مخ تړلې دي

د افغانستان ختيځ ننګرهار ولايت د ده بالا په ولسوالۍ کې د حکومت وسلوالو مخالفينو ښوونکو ته ګواښ کړی چې ښوونځيو ته ولاړ نه شي.

د ننګرهار د پوهنې رياست چارواکي تاييدوي، چې طالبانو په دغه ولسوالۍ کې د ۲۸ ښوونځيو دروازې تړلي چې له امله يې نژدې ۲۰۰۰۰ زده کوونکي له زده کړو بې برخې شوي دي.

د دغه رياست وياند اصف شېرزاد تاييدوي چې له تېرو دريو ورځو راهيسې د ده بالا ولسوالۍ د يو شمېر کليو ښوونکو او زده کوونکو ته ګواښ کېږي چې ښوونځيو ته ولاړ نه شي.

ښاغلی شېرزاد وايي ارزونې ښيي، چې طالبان د دغو ګواښونو د لرې کېدو په بدل کې له ځايي چارواکو غوښتي، چې د دغې ولسوالۍ يو شمېر امنيتي مسوولين بدل کړي، د دوی ځيني زنداني شوي ملګري خوشي کړي او خوراکي توکي او درمل ورته برابر شي.

دی وايي د زده کوونکوو ازموينې نژدې دي او حکومت بايد د ښوونځيو د بېرته پرانستو لپاره ګامونه پورته کړي.

د ده بالا ولسوالي د ننګرهار په سويل کې پرته ده، چې د پاکستان له قبايلي سيمې سره ګډه پوله لري.

مخکې د ننګرهار امنيه قومندان فضل احمد شېرزاد ويلي و، تېره ورځ يو شمېر وسلوالو هڅه وکړه چې يو شمېر ښوونکي ښوونځيو ته له ورتلو راوګرځوي.

د ننګرهار امنیه قومندان که څه هم وايي له سيمې ډېر جزييات نه لري، خو دا تاييدوي چې د افغانستان د ملي امنيت ځواکونو له لوري د طالبانو د دوو غړو له نيولو وروسته طالبان دغې ولسوالۍ ته ورغلي او ښوونکي يې ګواښلي چې ښوونځيو ته ولاړ نه شي.

ښاغلی شېزاد وايي طالبانو ګواښ کړی که د دوی ملګري خوشي نه شي، ښوونکو ته به د درس ورکولو اجازه ور نه کړي.

دی وايي د سيمې مخور د دغې ستونزې د هواري هڅې کوي.

طالبانو تر اوسه په دې اړه څه نه دي ويلي.

ننګرهار چې د پاکستان له قبايلي سيمې سره ګډه پوله لري په يو شمېر ولسواليو کې يې وسلوال طالبان نفوذ لري او وخت ناوخت په مرکز جلال اباد او نورو سيمو بريدونه کوي.

ورته مطالب