'افغانستان کې سوداګري، پانګونې او کار ته هیله مندې ډېره شوې'

Image caption د خصوصي سکتور ډېر شکایتونه له نا امنیو وو عتیق الله نصرت

د افغانستان د سوداګرۍ خونې دیوې سروې موندنې ښیي چې په دغه هېواد کې د سوداګرۍ، پانګونې او کار په اړه خوشبیني ډېره شوې ده.

د سروې له مخې، په تېرو دریو میاشتو کې د کار وضعیت ۳۲ سلنه ښه شوی دی. شپږ میاشتې وړاندې دغه کچه له یو فیصده هم کمه وه.

د ټاکنیزو لانجو د اوږدیدو پرمهال په افغانستان کې پانګونه او نورې چارې ټکنۍ شوې وې.

حفیظ الله معروف د سوداګرۍ خونې د سروې په اړه رپوټ کې کاږي، چې د افغانستان سوداګرۍ او صنایعو خونې په پنځو ولایتونو هرات، بلخ، ننګرهار، کندهار او پلازمېنې کابل کې له ۱۲۰۰ نه ډېرو تولیدي او صنعتي شرکتونو سره د پانګونې د وضیعت په اړه مرکې کړې دي.

په دغو شرکتونو کې اتیاسلنه هغه شرکتونه وو، چې په تېرو شپږو میاشتو کې یا بشپړ تړل شوي وو او یا یې کارونه محدود وو.

د دغې سروې موندې ښيي چې د مني په دریو میاشتو کې د کاروبار په اړه هیله مندۍ له نژدې یوې سلنې نه ۳۲ سلنې ته لوړې شوې دي.

د افغانستان د سوداګرۍ او صنایعو خونې اجرایوي مشر عتیق الله نصرت په کابل کې د دغې تازه سروې پایلې خبریالانو ته اعلان کړې.

' له نیکه مرغه د نوي ملي وحدت حکومت له جوړیدو را وروسته، زموږ دسروې له مخې خوشبیني څو برابر لوړه شوې ده. له کارو بار نه د خلکو رضایت چې پخوا صفر اعشاره اوو یا اته سلنه و، اوس څه باندې ۳۲ سلنه شوی دی. د نوي حکومت کړو ژمنو ته د خلکو هیله مندي ډیرې شوې خو په عملي ډول د خصوصۍ سکتور په برخه کې چندان مثبت بدلونونه نه لیدل کېږي.'

ښاغلی نصرت وايي چې په افغانستان کې د روان لمریز کال په لومړیو دریو میاشتو کې د پانګونې وضعیت خورا ناوړه و او د ټاکنو اوږد بهیر او ناامنیو د دغه هېواد د اقتصاد حالت له ځوړ سره مخامخ کړی و. 'د خصوصي سکتور ډېر شکایتونه له نا امنیو وو ځکه ۲۰۱۴ کال له ننګونو ډک کال بلل کېده او په دې کال ناامني نه یوازې خصوصي سکتور ته متوجې وې بلکې ټول هېواد یې له ستونزو سره مخامخ کړی و. د دې ترڅنګ د ټاکنو اوږد بهیر هم د سوداګرۍ پر وضعیت منفي اغیز پرایستی و.'

د سوداګرۍ خونې په رپوټ کې د برېښنا، ځمکې او د حکومتي ملاتړ نشتوالی د سوداګریزو او صنعتي شرکتونو لپاره نورې لویې ننګونې بلل شوې دي.

ښاغلی نصرت وايي له هغو شرکتونو چې مرکې یې ورسره کړي، ۷۷ سلنه یې له برېښنا ته لاسرسی نه لري. د سوداګرۍ خونه له نوي حکومته غوښتنه کوي چې په افغانستان کې د سوداګرۍ پر وړاندې پرتې ستونزې هوارې کړي.