د هرات او کندهار والیان وټاکل شول

د انځور حقوق g

د افغانستان ولسمشر محمد اشرف غني محمد آصف رحیمي د لوېدیځ هرات د والي او همایون عزیزي د سوېلي کندهار د والي په توګه ټاکلي دي.

د افغانستان د سیمه ییزو ارګانونو ادارې په یوه خبرپاڼه کې ویلي، ښاغلي غني دواړه والیان هند ته له خپل درې ورځني سفر وړاندې ټاکلي دي.

محمد آصف رحیمي وړاندې د کرنې او مالدارۍ وزیر پاتې شوی، او همایون عزیزي مخکې پارلماني چارو کې د دولت د وزیر په توګه کار کړی دی.

هرات او کندهار د افغانستان سرحدي ولایتونه دي، چې دوه مهم ګومرکونه (اسلام کلا په هرات کې او سپین بولدک په کندهار کې) پکې پراته دي، چې د هېواد اقتصاد ته د پام وړ اوږه ورکوي.

د سیمه ییزو ارګانونو اداره وايي، هرات له هغو ولایتونو دی، چې د هر اړخیزې پراختیا لپاره مناسبه وړتیا لري.

د انځور حقوق BBCpashto.com
Image caption محمد آصف رحیمي

دغه اداره وايي، د کندهار، تاریخي، سیاسي او امنیتي وضعیت ته په کتلو سره، دغه ولایت د مرکزي ادارې لپاره ډېر اهمیت لري.

آصف رحیمي

محمد آصف رحیمي د مخکیني ولسمشر حامد کرزي د واکمنۍ پرمهال د کرنې او مالدارۍ وزیر پاتې شوی.

د انځور حقوق df
Image caption همایون عزیزي

هغه په ۱۹۵۹ کال کابل کې زیږېدلی، له لیسانس لوړې زده کړې یې په عامه اداره او پراختیايي پروګرامونو کې کړې دي، او په ۱۹۸۹ کال د امریکا له نبراسکا پوهنتون فارغ شوی دی.

همایون عزیزي

همایون عزیزي په ۱۳۵۳ کال هرات کې زیږېدلی او فرانسه کې یې طبي زده کړې کړې دي. په لومړي پړاو کې د هرات د ولایتي شورا مشر ټاکل شوی، او په ۱۳۸۹ کال د حامد کرزي په امر پارلماني چارو کې د دولت د وزیر په توګه ګومارل شوی دی.