وکيلانو معصوم ستانکزي ته د تاييد رايه ور نه کړه

Image caption د ولسي جرګې د ۲۱۳ حاضرو غړو له ډلې ۸۴ وکيلانو ښاغلي ستانکزي ته د باور او ۱۰۴ د رد رايه ورکړه. اووه رايې سپينې وې او ۱۸ باطلې

د افغانستان ولسي جرګې محمد معصوم ستانکزی چې افغان ولسمشر اشرف غني دفاع وزارت ته نومولی و د وزير په توګه تاييد نه کړ.

په جرګه کې نن (شنبه، جولای ۴) ۲۱۳ وکيلان حاضر وو او نوماند وزير بايد د حاضرو غړو نيمايي جمع يوه رايې چې ۱۰۷ کېدې خپلې کړې وای.

ښاغلي ستانکزي و نه شو کړای ۱۰۷ رايې خپلې کړي. ده ته وکيلانو ۸۴ د تاييد او ۱۰۴ رد رايې ورکړې.

ولسمشر اشرف غني څو اوونۍ وړاندې ښاغلی ستانکزی د ملي دفاع وزارت د سرپرست په توګه معرفي کړ.

له رايې اچونې وړاندې معصوم ستانکزي د ولسي جرګې استازو ته په خبرو کې وويل چې د امنيت په ټينګښت کې ټول مسوول دي او ټوله پړه یې بايد پر نورو وا نه اچول شي.

په هېواد کې دننه د دفاعي صنايعو پياوړتیا، د موازي ادارو له منځه وړل، د نړیوالو او افغان ځواکونو ترمنځ د همغږۍ زياتول او په ادارو کې شفافيت يې له مهمو لومړيتوبونو څخه و.

د ملي یووالي حکومت د کابینې په لومړي نوملړ کې پخوانی لوی درستیز جنرال شیر محمد کریمي دفاع وزارت ته نومول شوی و، خو و نه توانېد چې د وکيلانو باور خپل کړي.

تر ښاغلي کريمی وروسته افضل لودین دفاع وزارت ته ونومول شو، خو نوموړی پخپله خوښه د دفاع وزارت له نوماندۍ لاس پر سر شو.

محمد معصوم ستانکزی له تېرو څو کلونو راهیسې د سولې د عالي شورا د دارالانشاء مشر دی، چې د سولې په خبرو کې مهمه څېره بلل کېږي.

ښاغلي ستانکزي د مخابراتو او ټکنالوژۍ د وزیر او د مخکیني ولسمشر حامد کرزي د سلاکار په توګه کار کړی دی.

ورته مطالب