د افغانستان شمال کې دوه ماشومان وژل شوي

د انځور حقوق f

د افغانستان شمالي بلخ ولایت چارواکي وايي، ددې ولایت په شولګره ولسوالۍ کې پر یوه موټرسایکل د ځای پرځای شویو چاودېدونک توکو د چاودنې له کبله دوه ماشومان وژل شوي.

چارواکي وايي چاودنه د اختر لمانځه تر ختمېدا وروسته له یوه جومات نه د وتلو پرمهال شوې ده.‌

د بلخ د پولیسو مشر شیرجان دراني بي بي سي ته وویل، پېښه کې دوه ماشومان وژل شوي.

تر اوسه ددې چاودنې پړه چا نه ده منلې.

پېښه داسې مهال شوې چې د افغانستان ولسمشر محمد اشرف غني د کوچني اختر په ورځ پخپلو خبرو کې هیله وښوده چې دا اختر افغانستان کې له وینې تویېدو پرته په خوښیو تېر شي.‌

له اختر یوه ورځ وړاندې، ‌په افغانستان کې د ملګرو ملتونو ځانګړي استازي نیکولاس هیسم له ښکېلو غاړو وغوښتل چې د اختر په ورځو کې له جګړې لاس واخلي او افغانان په آرامه فضا کې خپل مذهبي مراسم ترسره کړي.