د غزني پر محبس د طالبانو په برید کې ۳۵۵ طالب بندیان تښتېدلي

په دې وسیله کې د غږ اوريدل او ویډیو لیدنه شونې نه ده.

د غزني له ولایت څخه رپوټونه وايي چې طالبانو د غزني پر محبس برید کړی او ۳۵۵ بندیان یې له زندانه اېستلي دي.

د طالبانو ویندوی منلې ده چې برید د زنداني طالبانو د خلاصون لپاره شوی دی.

د غزني د والي مرستیال محمد علي احمدي بي بي سي ته وویل، تېره شپه نژدې دوه بجې طالبانو لومړی د یوه موټر بم او راکټونو په مټ د محبس دروازه الوځولې او وروسته یې خپل ملګري له زندانه خوشي کړي دي.

نوموړی وايي، په تښتېدلو بندیانو کې ۱۴۷ یې په طالبانو پورې اړه لري، نور هغه د جنايي، نشه يي توکو او ترافیکي پېښو په تور نیول شوي کسان دي.

په تښتېدلو بندیانو کې یوه ښځه هم ده.

له برید سره هم مهاله، طالبانو د غزني پر امنیتي کمربند پر لسو پوستو برید کړی او افغان امنیتي ځواکونه یې بوخت ساتل.

د ښاغلي احمدي په وینا یو شمېر طالبانو د افغان ځواکونو درېشۍ اغوستې وې او له چاودنې وروسته زندان ته ننوتلي دي.

ښاغلی احمدي وايي د افغان امنیتي ځواکونو اووه کسان په نښته کې وژل شوي او اته کسان ټپیان دي.

احمدي وايي، دوه بندیان د تېښتې پرمهال بېرته نیول شوي.

نوموړی دا هم وايي، چې په دغو بندیانو کې تر ډېره د جنايي پېښو بندیان هم دي، چې د غلاوو او قتلونو په تور نیول شوي.

د افغانستان د کورنیو چارو وزارت په یوه خبرپاڼه کې ویلي، د دې پېښې د څېړلو لپاره یې غزني ته یو پلاوی استولی، چې په جدي ډول پېښه وڅېړي.

د غزني د ولایتي شورا مرستیال عبدالجامع جامع وویل، ډېر امکان شته چې دغه کسان د کومې معاملې په پایله کې خوشي شوي وي، چې د نوموړي په وینا، ښکاري، چې د محبس چارواکو دې ناغېړي کړې وي.

Image caption د غزني سیمه ییز چارواکي وايي، ۸۰ بندیان په تېښته نه دي توانېدلي.

د غزني د ولایتي شورا مشر وايي، د کورنیو چارو وزارت باید د غزني خلکو ته ځواب ووايي، چې ولې په دومره ډېر شمېر کې بندیان په یوځلي ډول خوشي کېږي.

د غزني سیمه ییز چارواکي وايي، ۸۰ بندیان په تېښته نه دي توانېدلي.

په دغه زندان کې تر څلورو سوو ډېر بندیان ساتل کېدل.

د غزني محبس د ښار په سوېل کې شااوخوا څلور کیلومتره لیرې پروت دی، چې ډېر جدي امنیتي تدابیر ورته نیول شوي وو.

د وسله والو طالبانو ویاند ذبیح الله مجاهد ویلي، په موټربم برید کې د دوی درې کسان وژل شوي.

مجاهد زیاتوي، په تښتېدلو طالب بندیانو کې ځینې قومندانان او په جګړو کې نیول شوي طالبان دي.

د غزني د ملکي روغتون ریس ډاکټر باز محمد همت بي بي سي ته وویل، نن ګهیځ دوی ته څلور مړي او ۱۴ ټپیان وروړل شوي دي.

په ۲۰۱۱ کال هم د کندهار زندان ته د څو سوه متره کیندل شوي تونل له لارې د ځینو طالب بندیانو په ګډون نژدې ۵۰۰ ب ندیان وتښتېدل.

د ۲۰۰۸ د جون پر ۱۳مه هم له کندهار زندانه سلګونه بندیان تښتېدلي وو.

ورته مطالب