ختيځو ولایتونو کې د ناامنیو خلاف کابل کې احتجاج وشو

Image caption اعتراض کونکو له حکومته غوښتل، چې د ختیځو سیمو امنیت ته جدي پام وکړي

د ختیځو ولایتونو مدني فعالان نن ( چهار شنبه ) په کابل کې د ولسي جرګې مخې ته راټول شوي وو او د ننګرهار د وروستیو ناامنیو په اړه یي اعتراضیه غونډه وکړه.

اعتراض کونکو له دولت نه غوښتل چې د ننګرهار امنیت ته دې جدي پاملرنه وکړي.

له کابل احمدیما په خپل راپور کې کاږي، چې

ننګرهار دا وروستیو بریدونو په ځانګړي توګه د ولایتی شورا د غړي پر کور ځانمرګي برید د ختیځو ولایتونو مدني فعالان د ولسي جرګې تر دروازې ورسول.

اعتراض کوونکي ادعا کوي چې د دولت نه پاملرنې د ننګرهار امنیت له ګواښونو سره مخامخ کړي او یو شمیر کسان په دغه ولایت کې د ځانمرګو بریدونو، چاودنو او تروریستي پېښو قرباني شوي دي.

دغو کسانو ویل، د خلافت په نامه د 'اسلامی دولت' یا داعش راډیو د خلکو پر ذهنو منفي اغیزه کړې ده.

د دغې اعتراضیه غونډې یوه ګډون کونکي میرویس میاخېل له دولته وغوښتل چې د ننګرهار امنیت ته جدي پاملرنه وکړي.

د ننګرهار ولایت مدني فعال میرویس خوګیانی چې کابل ته راغلی، وایی په یاد ولایت کي د خلکو ورځنی ژوند له کړاونو سره مخامخ دي.

اعتراض کوونکو خبرداری وکړ که دولت د ختیځو ولایتونو امنیت ته پاملرنه ونه وکړي لرې نه ده چې لمبې یې تر کابله را ورسېږي.