" وسله والې ډلې دې پر ملکیانو قصدي بریدونه ودروي"

د انځور حقوق website

د بشري حقونو د څار نړیوال سازمان په افغانستان کې له وسله والو ډلو غوښتي چې په چټکه دې پر ملکي وګړو قصدي بریدونه ودروي.

تېره ورځ یوه ځانمرګي بریدکوونکي په کابل کې د موبي رسنیز ګروپ د کارکوونکو بس موټر په نښه کړ چې په پایله کې یې اووه کسان ووژل شول او لږ ترلږه ۲۵ نور ټپیان شول.

ددې برید مسوولیت طالبانو پرغاړه واخست.

د بشري حقونو سازمان په خبرپاڼه کې ویل شوی، د موبي ګروپ پر کارکوونکو ځانمرګی برید، "په افغانستان کې د آزادو رسنیو د فعالیت کمزورې کولو لپاره یوه قصدي کړنه وه".

په افغانستان کې ددې سازمان څېړونکې پتریشا ګوسمن ویلي: "خبریالان او نور ملکي وګړي، پوځي هدف بلل، واقعیت نه بدلوي. پر خبریالانو او ملکیانو قصدي بریدونه کول لکه جنګي جرمونو دي."

Image caption خبریالان او نور ملکي وګړي، پوځي هدف بلل، واقعیت نه بدلوي. پر خبریالانو او ملکیانو قصدي بریدونه کول لکه جنګي جرمونو دي: ګوسمن

د تېرې ورځې ځانمرګی برید څو میاشتې وروسته له هغه کېږي چې طالبانو د افغانستان د "طلوع" او "یک" ټلویزیونونه د کندوز جګړې پرمهال پر نه بې طرفۍ تورن کړل او اعلان یې وکړ چې ددې شبکو دفترونه او کارکوونکي دوی ته پوځي هدفونه دي.

دواړه ټلویزیونه خصوصي دي.

د موبي رسنیزه ډله په افغانستان کې د څو رسنیو او اړونده بنسټونو د امتیاز څښن ده.

نور غبرګونونه

د افغانستان ولسمشر محمد اشرف غني چې د داووس غونډه کې د ګډون لپاره سویس ته تللی، دغه برید غندلی او هغه یې "د افغانستان د خلکو پروړاندې نه بښونکی او ډارن عمل" بللی دی.

د افغانستان حکومت اجراییه رییس عبدالله عبدالله هم د موبي ګروپ پر کارکوونکو پرونى برید به کله غندلی او هغه یې "ترهګریز او ډارن" اقدام بللی دی.

په افغانستان کې د ملګرو ملتونو سیاسي استازولی (یوناما) په خپل ټویټر کې ددې برید "مسوولان" غندلي او ویلي چې تردې برید وروسته کابل کې د رسنیزو کارکوونکو پر امنیت سخت "اندېښمن" دي.

ورته مطالب