پښتو هم د ګووګل ژباړن ته ور زياته شوه

د انځور حقوق f

ګووګل له پنجشنبې (۱۸ فبرورۍ) د پښتو په ګډون د ١٣ نوو ژبو د ژباړې خدمتونه ګووګل ژباړن (ګووګل ټرنزلېټ) ته ور زيات کړي دي.

په دغو ۱۳ نويو ژبو کې کوردي، سندي او ځينې نورې ژبې هم شاملې دي.

ګووګل ژباړن ټولې ۱۰۳ ژبې لري چې يوه يې هم پښتو ده. اوس به د دې کاروونکي کولای شي چي له دې لارې پښتو هم بلې ژبې ته واړوي او هم له نورو ژبو پښتو ته متن وژباړي.

د غه شرکت چې په وړيا د ژباړې دا خدمتونه وړاندې په خپله اعلاميه کې ويلي چې له دې پرېکړې څخه هدف يې د هغو خلکو تر منځ چې په دغو ژبو خبرې کوي د اړيکو اسانول دي.

ګووګل دغه پرېکړه د پښتنو د ليکلو غوښتنو څخه وروسته کړې ده. دغو کسانو په دې تړاو په تېرو دريو کلونو کې پر انلاين يوه مبارزه پيل کړې وه او د دې لپاره يې امضاوې او غوښتنې راټولې کړې وې.

ګووګل ژباړن لومړی په ۲۰۰۶ کال کې په کار پیل کړی و او په لومړی سر کې يې يوازې په انګريزي، روسي، عربي او چينايي ژبو ژباړه کوله، خو اوس په ۱۰۳ ژبو خدمتونه وړاندې کوي.

ويل کېږي دغه کار کولای شي د پښتو ژبې د ودې په برخه کې يو لوی رول ولوبوي او د دې ژبي د پرمختګ سبب شي.

ګووګل پښتو ژباړه اوسمهال لږ څه ستونزې لري چې تمه کېږي کېداشي په راتلونکې کې به حل شي.

ورته مطالب