د ایراني تلوېزیون 'شیوع' ډرامې د افغانانو غوسه پارولې

د انځور حقوق ILNA

د ایران په یوه تلوېزیون کې د ''شیوع'' په نامه پر ډرامې ګڼو افغانانو پر خواله رسنۍ سخت غبرګون او غوسه ښودلي دي.

کله چې ددغه تلوېزیوني سریال لومړۍ برخه خپره شوه، افغان ګوتنیوونکو دا کار ''له افغانانو د کرکې او سپکاوي'' خپرولو په معنا تعبیر کړ.

دغه ډرامه ۱۳ برخې لري، چې تر اوسه یې درې برخې د ایران په یوه تلوېزیون کې خپرې شوې دي، د سریال اصلي کیسه د امریکا له خوا د ''بیولوژیکي برید'' په تړاو ده.

په ډرامه کې د یوه افغان په رول یو کس لوبېدلی، چې ایران ته سفر کوي.

ددغې ډرامې داستان مهدي احمدي لیکلی او د اووم حس فیلم جوړونې مؤسسې یې جوړولو ته ملا تړلې ده.

په ایران کې د خواله رسنیو یوه کاروونکي د سریال د لومړۍ برخې په تړاو اعتراض کړی او پر خپل فېسبوک یې لیکلي چې: ''یو پنځه دېرش کلن سړی مې څوکۍ کې ترڅنګ ناست و، له ما یې وپوښتل: تېره شپه دې خپل وطندار ولید؟ ومې پوښتل: کوم وطندار؟ ویې وویل: ''هغه چې تېره شپه په سریال کې له افغانستان نه راغلی و او له ځان سره یې ویروس راوړی و''.

د سرچینې په وینا، هر ګام چې د ایران ''صدا او سیما'' اخلي، د ایران په ټولنه کې یې پایلې او اغېز حساس وي.

ځینو افغانانو د ایران سفارت ته په یوه لیک کې ددغه فلم وړاندې کېدل غندلي دي.

د لیک په یوه برخه کې راغلي: ''غوره دا ده چې په ایران کې رسنۍ د مسلمانانو ترمنځ د نفاق او اختلاف رامنځ ته کولو پرځای د مسلمانانو د یووالي لپاره کار وکړي''.

ورته نیوکې د ایران په ځینو رسنیو کې هم راغلې دي.

د ایران ''تسنیم'' خبري آژانس ددغه سریال د وړاندې کېدو په اړه یوه مقاله لیکلي ده چې وايي: ''طبیعي ده چې اصلي داستان، یعنې د دوو ملتونو ایران او افغانستان د قرباني کولو لپاره د لویو بهرنیو ښکېلاکګرو دسیسې په دې متن کې اثبات ته اړتیا نه لري''.

خو ددغې تلوېزیوني لړۍ چمتو کوونکي بیژن شیرمرز بیا دا ډول څرګندونې له وخت وړاندې خبرې ګڼلې دي.

دی وايي: ''ددغه سریال مخاطبان باید ژر قضاوت ونه کړي او لږ تم شي چې سریال تر یوه ځایه ورسېږي، هغه وخت وګوري چې موږ افغانانو ته سپکاوی نه کوو او دوی زموږ د وروڼو په څېر دي''.

په ایران کې د قومي، کلتوري، ژبني او مذهبي حساسیتونو ډکو پروګرامونو خپرېدو په وروستیو کلونو کې لانجمن بحثونه راپارولي دي.