پر تورخم بې اسنادو افغانان اوښتو ته نه پرېښودل کېږي

پاکستاني چارواکو د تورخم پر پوله هغه افغانان پاکستان ته نه پرېږدي، چې قانوني اسناد ونه لري. دواړو غاړو ته ګڼ افغانان راغونډ شوي دي.

د چارشنبې پر ګهیځ پاکستاني پوځيانو په تورخم پوله کې د لاسپیکرو په مټ خیبر پښتونخوا ته د اوښتونکو افغانانو لپاره اعلانونه وکړل، چې له اسنادو پرته د اوښتو هڅه ونه کړي.

د بي بي سي یو خبریال رفعت الله اورکزی وايي، د پاکستان په سرحدي ښارونو کې د افغان کډوالو د وېزو په اړه لټون پیل شوی، او یوازې هغه کډوال پرېښودل کېږي، چې د پاتې کېدو قانوني اسناد ولري او راجستر شوي وي.

د پاکستاني چارواکو لخوا افغانانو ته په تورخم لویې لارې د تګ راتګ موده د مې پر ۳۱مه پای ته ورسېده او د جون له لومړۍ نېټې (چهارشبنې) ورځې له قانوني اسنادو پرته يوه افغان وګړي ته هم پاکستان ته د ننوتلو اجازه نه ورکول کېږي.

لومړې پاکستاني چارواکو د اپرېل ۳۱ د افغانانو لپاره وروستۍ نېټه ټاکلې وه، خو بيا وروسته دغه موده د يوې مېاشتې لپاره وغځوله شوه.

افغان حکومتي چارواکو پاکستاني چارواکو ته د قانوني اسنادو په اړه د دغې مودې د غځولو لپاره رسمي عريضه ورکړې. په عريضه کې ویل شوې چې پاکستان دې د قانوني اسنادو په اړه له نرمۍ کار واخلي چې افغان وګړو ته د روژې او کوچني اختر په ورځو کې تګ راتګ اسانه شي.

په مرکزي ښار پېښور کې افغان کډوال د پاکستان له حکومت نه غواړي چې په تورخم پوله د مسافرو د اوښتو راوښتو شرطونه نرم کړي.

د افغانستان د کډوالو چارو وزیر سید حسین عالمي بلخي د پاکستان حکومت ته یو غوښتنلیک ورکړی، چې تر ۲۰۲۰ کال پورې پاکستان کې د افغان کډوالو د پاتې کېدو د مودې غځولو رسمي غوښتنه او د پاتې کېدو اجازه پکې غوښتل شوې ده.

پاکستان کې د افغان کډوالو د ثبت کارټونو موده د جون پر ۳۱ نېټه پای ته رسېږي.

پاکستاني چارواکو ويلي و د کابېنې په غونډه کې به پاکستان کې د افغان کډوالو د پاتې کېدو په اړه پرېکړه وکړي، خو پاکستان حکومت تراوسه دغه پرېکړه نه ده کړې.

د انځور حقوق Getty

د یوې سروې له مخې، پاکستان کې کابو ۲٫۵ ميليونه افغان کډوال ژوند کوي چې ډېر کم یې ثبت شوي دي.

ورته مطالب