کابل: د سولې په اړه د مسکو غونډه کې ګډون نه کوو

دا له نورو سره شریک کړئ Email دا له نورو سره شریک کړئ فېسبوک دا له نورو سره شریک کړئ ټوېټر دا له نورو سره شریک کړئ Whatsapp

Image copyright AFGHAN MoFA
Image caption د بهرنیو چارو وزارت وایي د خبرو مشري باید افغانان وکړي

کابل وایي په مسکو کې د افغانستان د سولې په اړه جوړېدونکې غونډه کې ګډون نه کوي.

د افغان حکومت په دریځ کې دا بدلون د روسیې د بهرنیو چارو وزیر سرګی لاوروف تر پروني اعلان وروسته راغی چې ویل یې طالبانو منلې د مسکو غونډې ته ورشي.

په کابل کې د بهرنیو چارو وزارت ویاند صبغت الله احمدي وایي د سولې داسې غونډې ته چې مشري یې له افغانانو سره نه وي، استازی نه لېږي.

نوموړي وویل:

"د سولې پروسه د افغانستان لپاره یوه ملي پروسه ده. رهبري یې باید د افغانستان د اسلامي جمهوریت په لاس کې وي. هېڅ هېواد او هېڅ سازمان د افغانستان د اسلامي جمهوریت له رهبرۍ پرته د سولې د بهیر د سر ته رسولو وړتیا نه لري. موږ د مسکو په غونډه کې ګډون نه کوو".

خو په ورته وخت کې کابل له مسکو نه غوښتي د افغانستان په اړه خپل راروان نړیوال کنفرانس کې طالبان وهڅوي چې له افغان حکومت سره مخامخ خبرو ته کېني.

د ملي امنیت شورا سلاکار حنیف اتمر په کابل کې له روس سفیر سره په کتنه کې دغه غوښتنه کړې ده.

Image copyright Getty Images
Image caption ښاغلي اتمر له روسیې غوښتي چې طالبان سولې ته وهڅوي

هغه وویل که طالبان جګړه ودروي د نورو بهرنیو ترهګرو ډلو خلاف هڅې ښې یوموټی کېدلی او سمبالېدلی شي.

ښاغلي اتمر په دې کتنه کې دغه راز د سولې او له طالبانو سره د خبرو په اړه د پاکستان تګلاره ناسمه بللې او غوښتنه یې کړې چې پاکستان دې خپل چلند په ریښتینولۍ ودروي.

روس سفیر له افغانستان سره په سوله کې د خپل هېواد پر همکارۍ ټینګار وکړ.

بله خوا د روسیې د بهرنیو چارو وزارت په یوه اعلامیه کې ویلي، د امریکا پر دې پرېکړه خپه دي چې د افغانستان په اړه د مسکو په خبرو کې ګډون نه کوي.

د امریکا حکومت وار د مخه ویلي وو چې نه غواړي د مسکو د خبرو برخه و اوسي.

د روسیې د بهرنیو چارو وزارت اعلامیه زیاتوي چې دوی د امریکا پر دې پرېکړه حیران نه دي، ځکه واشنګټن تر دې وړاندې په ۲۰۱۷ کال کې هم دې ته ورته یوه غونډه کې له ګډونه انکار کړی و.

د روسيې د بهرنیو چارو وزارت په وینا، د سپتمبر میاشتې په ناسته کې به د روسیې، چین، ایران، پاکستان او هند په ګډون د منځنۍ اسیا پنځه هېوادونه هم برخه اخلي.

مسکو تور لګولی چې واشنګټن یوازې په هغو غونډو کې ګډون کوي چې مشري یې د امریکایانو په لاس کې وي، او د امریکا ګټې پکې خوندي وي.