یو انځور د ۱۱۰ میلیونو ډالرو بدل کې پلورل شوی

  • 15 می 2019 - 25 غویی 1398
انځور د انځور حقوق Reuters
Image caption دغه انځور د امریکا متحدو ایالتونو نیویارک په یوه لیلامۍ کې پلورل شوی دی

د فرانسوي انځورګر کلاوډ مونیټ په لاس یو پنځول شوی انځور د ۱۱۰ اعشاریه اووه میلیونو ډالرو بدل کې پلورل شوی دی. د دومره ډېرو پیسو بدل کې د دغه فرانسوي انځور ګر یوه پنځونه پلورل کېدل یو نړیوال ریکارډ دی.

دغه راز دا لومړی ځل دی چې یو امپرېشنسټ انځور له ۱۰۰ میلیونو ډالرو د پورته بیې بدل کې پلورل کېږي.

مونیټ دغه انځور ۱۸۹۰ کال کې د انځورونو خپلې هغې لړۍ کې بشپړ کړ چې هایسټکس نوم ورکړل شوی و او په نورماندې سیمه کې د هغه کور ته څېرمه کلیواله سیمه انځوروي.

له دې مخکې دغه انځور په ۱۹۸۶ کال کې ایله د دونیم میلیونو ډالرو بدل کې پلورل شوی و. له دې مخکې تر نژدې یوې سلیزې پورې دغه انځور هغې کورنۍ ساتلی و چې د انځورګر له استازي یې پېرلی و.

اوس د انځور پلورونکې ادارې سوتبهې په یوه اعلامیه کې ویل شوي، دا نهم تر ټولو ګران بیه انځور دی چې په لیلام کې پلورل کېږي. ویل کېږي هغه کس چې د نیویارک لیلامۍ ادارې یې نوم نه دی یاد کړی، له پنځو نورو مشتریانو ډېره بیه ورکړه.

د مونیټ په هایسټکس لړۍ کې ټولټال ۲۵ انځورونه پنځولي و، چې ډېر یې اوس د نړۍ لر او بر په ګالریو کې ځوړند دي. اوسنی پلورل شوی انځور د نوموړي هنرمن څلورم انځور دی چې روانه پېړۍ کې لیلامېږي.

اړونده مطالب

ورته مطالب