ایما واټسن؛ داسې هنرمنه چې یوازې خوشاله وي

Emma Watson د انځور حقوق Getty Images

د هالیووډ وتلې هنرمنه ایما واسټن وايي، له خپلې ۳۰ کلیزې وړاندې د شخصي ژوند په تړاو د فشار له امله پرېشانه او بې سکونه کېږي.

نوموړې دا مهال ۲۹ کلنه ده، خو د راتلونکي کال اپرېل کې ۳۰ کلنه کېږي.

هغه وايي، په ذهن کې یې په دې تړاو ځینې وېرې او اندېښنې ور پیدا کېږي.

ایما وايي، له ځان داسې پوښتنې کوي چې تراوسه یې څه ترلاسول غوښتل.

برېټیش ووګ مجلې سره مرکه کې زیاتوي: "که واده دې نه وي بچیان به دې هم نه وي... دا ډول اندېښنه او پرېشاني تر نه باورېدونکي برید رسېږي".

خو دا برتانوۍ هنرمنه زیاتوي، یوازې خوشاله ده او خپله د ځان ملګرې ده.

د انځور حقوق Getty Images
Image caption پر ۲۰۱۴ کال د ملګرو ملتونو یوه ناسته کې د ښځو پر حقونو غږېږي.

هیري پاټر سره مشهوره شوې دا هنرمنه زیاتوي چې مخکې یې هم کله پر دې خبره باور نه و، چې یوازې به خوشاله وي، خو اوس باوري ده چې یوازې خوشاله وي:

"دې خبره کې ډېر وخت ولګېد، خو اوس یوازې خوشاله یم".

ایما د ښځو د حقونو لپاره هڅې کوي، هغه وايي ۲۰۱۸ کال یې د ژوند یو سخت پړاو و:

"ما تر ډېره دا فکر کاوه چې هر یو پر ۳۰ کلیزه ولې دومره شور جوړوي، دا ولې دومره لویه خبره ده. اوس په ۲۹ کال کې په ما هم دا فشار شته او دا هم د دې لپاره چې ناڅاپه له هرې خوا ماته اشارې کېږي. "

د نوموړې په خبره: "که کور دې نه وي جوړ کړی، خاوند نه لرې، اولاد دې هم نه وي او ته ۳۰ کلنۍ ته رسېږي، خپل مسلک کې هم خوندي او مهم ځای نه لري، یا ته اوس هم پر دې شیانو فکر کوې... دا اندېښنه تر نه باورېدونکي برید رسېږي".

د انځور حقوق Getty Images
Image caption د فرانسې ولسمشر ایمانویل مکرون سره پر مساوات خبرې کولې.

د ایما واټسن نوی فلم "لېټل ومن" به ډېر ژر خپور شي.

هغه وايي، له لورا ډرن او میرل سټرېپ سره ګډ کار یې ډېر خوښېږي:

"موږ درې واړو له لېټل ومن ډېر مخکې سره پېژندل. "

دا وايي، خپلو کې چې سره وي پر انساني حقونو خبرې کوي: "زموږ ملګرتیا د انساني همدردۍ د کارمنانو په څېر ده او موږ له ګډ کار مخکې هم د یوه غورځنګ برخه وو. "

د انځور حقوق Getty Images
Image caption هنرمه لورا ډرن او میرل سټرېپ هم کوچنۍ ښځه فلم کې رول لري.

ایما واټسن د ملګرو ملتونو له خوا د مېرمنو استازې ده او د هي فار شي په نوم د خوځښت غړې ده چې په نړیواله کچه د انډول لپاره غږ پورته کوي.

هغې په دې برخه کې د نوبل ګټونکې پښتنې ملالې یوسفزۍ سره هم مرکه کړې ده.

ملاله وايي، د ایما واټسن له وجې ځان ښځپاله یا فیمنسټه بولي او د خپل ځان لپاره په دې نوم کوم شک نه کوي.