د ټوکر کتاب

برېشنا وردګ د انځور حقوق ROSHNA WARDAG

لکه څنګه چې ویل کېږي زده کړه له زانګو پیل او د عمر په هر پړاو کې دوام مومي، نو ښایي چې هر ماشوم له پینځه یا شپږ میاشتنۍ وروسته له ليک او کتاب سره روږدی او آشنا شي.

خو موږ پخپله ټولنه او کلیو کورو کې ګورو چې زموږ داسې کمکیو ماشومانو ته کتابونه نه شته او که وي هم څوک یې په لاس نه ورکوي، چې څیرې به یې کړي، خوله کې به یې ووهي یا ښايي و به یې خوري.

د بېوزلو او غريبو کورنیو خو دا ګیله په ځای هم ده چې ماشومانو ته کتابونه له کومه کړي او دومره وړو کمکيانو ته خو یې د کتاب ورکولو او ورښودلو سوچ هم نه وي کړي.

ښایي دا نارینه وو ته دومره ستونزه نه ښکاري لکه څومره چې میندې پرې پوهېږي او د ماشومانو د روزلو او پاللو له کړاوه تېرېږي، ځکه د داسې کمکیانو د ستونزو ټول بوج میندې ګالي هغه هم د کلیو او اطراف له سختو کارونو سره سره د اولادونو پالل او روزل آسانه کار نه دی.

خو میندې کولای شي پخپلو لاسونو خپلو هغو ماشومانو ته چې لا ښوونځي ته د تللو جوګه نه دي، یا هلته ښوونځی بيخي شته نه، په خپلو کورونو کې په بيلابيل رنګ ټوکر باندې ليکل وګنډي او کتاب ترې جوړ کړي.

ما همداسې یوه هڅه او کوښښ وکړ چې یوه نمونه یا مثال کتاب په ټوکر جوړ کړم، که چېرې نورې خویندې هم د ماشومانو د زدکړې په برخه کې هڅې وکړي او خپل د خاپوړو ماشومان له کتابونو او مطالعې سره بلد کړي نو یو خو به د بېسوادۍ په قابو کولو کې مرسته کړې وي او بل يې د ماشومانو په سمه روزنه کې هم خپله غاړه خلاصه کړې وي.

د انځور حقوق ROSHNA WARDAG

که څه هم ما پښتو الف ب او انګریزي اې بي سی له ځینو رسمونو لکه مرغانو، ګلانو او داسې نورو سره پکې جوړ کړي چې په دې توګه ماشومان له انګریزي سره پښتو هم زده کړي، خو دا د هر چا د خپلې خوښې کار دی هر څنګه چې یې وغواړۍ هغسې یې جوړولی شي او خپل ماشومان پرې بسیا کولی شي.

لکه څنګه چې موږ په کلیو، بانډو او لېرې پرتو سیمو کې هم لوستې او پیاوړې خویندې لرو په تېره بیا د لاسي صنعت په ډګر کې، نو زموږ هره یوه خور کولی شي د خپلو ماشومانو لپاره په ټوکر ښایسته رنګین کتابونه پخپله خوښه جوړ کړي.

دوی کولی شي د جامو له سکښتونو، وړو او هغو ټوټو چې نور څه ته نه په کارېږي ښکلي کتابګوټي چې په هر ډول د دوی زړه وغواړي هغسې پخپل لاس وګنډي چې مصرف یې کم او ګټه یې ډېره ده.

دا ډول کتابونه هم آسانه او هم ارزانه دي، چې نه خرابېږي او نه هم څیرېږي، او که خیرن شي وینځل کېږي هم.

کوم کتاب چې ما جوړ کړی د ښکلا او اوډون له لحاظه سم نه دی، خو بیا هم یوه هڅه او نوښت دی د خپلې ژبې، خلکو او ګلالیو ماشومانو لپاره.

د انځور حقوق ROSHNA WARDAG

زما پوخ باور دی چې زموږ خویندې یې تر ما ډېر ځله ښه جوړولی شي. زموږ کلیوالې خویندې چې په لاسي صنعت او ګنډلو کې پوره مهارت لري، که چېرې دوی دغه مهارت په دې ډول د ماشومانو د زدکړې په برخه کې هم وازمویي، نو پایله به یې درستې ټولنې ته ښه وي.

په کلیو کې به چې پيغلې واده کېدې نو بوخڅه به یې ګنډله او په هغه کې به یې ځینې داسې بې ځایه خوارۍ کړې وې چې هېڅ مانا به یې نه لرله، خو دوی به ډېر ښایسته جوړ کړي وو او ډېر وخت او زحمت به یې پرې ايستلی و، لکه د کوټې څلورو دېوالو ته پردې او په هغه ګلان ګنډل او ځینې نور داسې شیان.

که چېرې دوی په بوخڅه کې په لاس ګنډل شوي کتابونه یوسي او یو ماشوم پرې خوشاله او د هغه ماشوم ذهن زدکړې ته تیار کړي دا به ډېر ښه وي.

کېدای شي په دې توګه مېرمنې له بې ګټې لاسي ګنډلو نه داسې یو څه وګنډي چې هم دوی پرې اسوده شي او هم یې ماشومان د خټو خځلو او کنځلو زده کولو نه د کتاب او زدکړې لور ته مخ کړي او د سبا ورځې غوره زده کوونکي او ښه انسانان شي.