یو خیرن جاکټ په کابو درې نیم لکه ډالره خرڅ شو

د انځور حقوق AFP/Getty
Image caption کرټ کوبیان دا جاکټ په ۱۹۹۳ کال کې اغوستی و

د کرټ کوبیان په نامه د یو پخواني امریکایي سندرغاړي یو جاکټ، چې نوموړي ۲۶ کاله پخوا اغوستې و او له هماغه راهیسې نه دی وینځل شوی، نیویارک کې په یوه بولۍ کې په ۳۳۴ زره ډالره خرڅ شوی دی. د کرټ د دې جاکټ ځینې برخې په سګرټو سوځېدلې وې او اوس یې هم داغونه پر ځای پاتې دي.

کرټ کوبیان د نېروانا په نامه د موسیقۍ ډله درلوده، او دا جاکټ یې په ۱۹۹۳ کال کې اېم ټي وي چنل یوه خپرونه کې اغوستی و.

هغه مهال دی د امریکا او نړۍ یو پېژندل شوی سندرغاړی و، خو د ډېر شهرت له کبله په رواني ستونزو اخته شو او په ۱۹۹۴ کې یې ځان وواژه.

ویل کېږي دا جاکټ له هغه راهیسې نه دی وینځل شوی چې کرټ د وروستي ځل لپاره اغوستی و.

اوس ویل کېږي چې دا د بولیو په تاریخ کې تر ټولو ګرانبیه جاکټ ګرځېدلی. د بولۍ مشر ډرېن جولین وایي، کرټ کوبیان په خپلو کالیو کې دا جاکټ تر ټولو ډېر خوښ و.

د انځور حقوق Getty Images
Image caption کرټ کوبیان په ۱۹۹۴ کال کې د رواني ستونزو له کبله ځان وواژه

په همدې بولۍ کې د کرټ یو ګیتار هم خرڅېدو ته اېښول شوی و، چې په ۳۴۰ زره ډالره وپلورل شو.

کرټ دا ګیتار د هنري سفرونو پر وخت له ځان سره ګرځاوه او له تېرو څو کلونو راهیسې د راک انډ رول په نامه نندارتون کې اېښودل شوی و.

کرټ کوبیان په ۱۹۸۷ کال کې د نېروانا په نامه د موسیقۍ ډله جوړه کړه او په ورپسې کلونو کې یې ډېر زیات شهرت ترلاسه کړ.

خو د همدې شهرت سره تړلیو رواني ستونزو له کبله یې په ۱۹۹۴ کال کې یوازې د ۲۷ کالو په عمر ځان وواژه.

ورته مطالب