د خوالۀ رسنۍ يا سوشل ميډيا او افغان امنيتي ځواکونه

فيسبوک عکس
Image caption په فيسبوک کې ځينو افغانانو د يوۀ ټپي شوي افغان عسکر عکس خپور کړى او ورسره يې ليکلي چې اتلانو ته سلام کوي

د خوالۀ رسنيو يا سوشل ميډيا کاروونکيو افغانانو تل پر افغان حکومت، چارواکو او امنيتي ځواکونو نيوکې کړې دي.

خو د يکشنبې تر بريد وروسته په کم سارې ډول د افغان امنيتي ځواکونو ستاينې وشوې. په فيسبوک کې ويس شيرزي ليکلي: "زۀ د سهار تر دوه نيمو بجو وېښ وم د ژورناليستانو سملاسي خپريدونکي رپوټونه مې تعقيبول، بريدونه تر ډيرو روان و خو ترهگرو هغه څه ترلاسه نه کړل چې غوښتل يې، د افغان ځواکونو له خوا خورا ستر کار ترسره شو."

ريحان خان بيا د يوۀ افغان کوماندو سرتيري په وينو لړلى عکس خپور کړى چې په سړک روان دى، دى تر عکس لاندې ليکي:

" يو زړور افغان کوماندو پوليس، که څه هم ټپي شوى خو لا هم له ترهگرو سره په جگړه بوخت دى او له خپل هيواده دفاع کوي، پر تاسو وياړو."

خو د عبدالرحمن په نامۀ يو کس بيا نيوکه لري:

" زړور به وي خو بې له شکه چې دوى لا چمتو نه دي، يوازې په کابل کې د طالبانو د له منځه وړلو لپاره ١٨ ساعتونه بوخت وو."

سعادت شفق بيا له خپلو ملگرو غوښتنه لري چې د دۀ په وينا ميړني ونازوي او تر درو ورځو پورې د خپل فيسبوک عکس د افغان کوماندو، ملي اردو او پوليسو په انځورونو سينگار کړي.

هما ناصري له افغان پوځ او پوليسو منندويه ده خو زياتوي:

" له تاسو مې ډير ښه نه راځي ځکه چې تاسو ته لا هم ډيره خواري په کار ده چې ځانونه د ريښتينو سرتيرو په څير ثابت کړئ خو په څه ډول چې امنيتي ځواکونو پرون جنگ وکړ موږ يې اړ کړو چې پرې ووياړو."

ډيرو نورو پر امنيتي ځواکونو د " پر تاسو وياړو" ستاينې کښلي دي. په تيوتر کې بيا د افغان ځواکونو زړورتيا او مسلکي وړتيا ياده شوې ده. حبيب خان توتاخيل ليکي:

" نن د خپلو ملي امنيتي ځواکونو له وړتيا ډير متاثر شوم. پرې وياړم او زړورتيا ته يې سلام کوم."

په يوۀ بل تيوت کې همدا کس ليکي:

"افغان امنيتي ځواکونو خپل استعداد وښود او ثابته يې کړه چې دوى له افغانستانه دفاع کولى شي."

ماريا حبيب په تيرتر کې د نړيوالو ځواکونو نشتوالى ښه بولي او ليکي:

"دا چې د افغانستان امنيتي ځواکونه د نړيوالو له مرستې پرته خپله کار کولى شي لويه خبره ده، ډير ښه."

د تيوتر يو بل کاروونکى رفيع فاضل افغان ځواکونه په دې د ستايلو وړ بولي چې د دۀ په وينا ولسي وگړي يې وساتل.

خو امجد اقبال بيا په تيوتر کې پوښتنه کوي چې ولې د دۀ په وينا د ناټو وژنې څوک نه غندي. د لقمان حکيم په نامۀ يوۀ کس بيا په فيسبوک کې شکايت کړى او ليکي:

"چاته ووا يو . چاسره خبرې شريکې کړو . وطن سره مينه نشته . وطن هروخت سرو لمبو کې سو ځي."

زلمى لودين بيا په خپل اند له دغو بريدونو ترلاسه شوى حالت داسې انځوروي:

"د يکشنبه بريدونو د طالبانو گڼ کسان ووژل، يو څه تبليغ ورته وشو چې لا زور لري خو افغان امنيتي ځواکونو په کې دومره نوم وگټلو چې دا ١٠ کاله يې نه و گټلى."