له فلج نه د دماغ ژغورونکي درمل جوړ شول

د خپريدو وخت: 12:06 گرینویچ - دوشنبه 08 اکتوبر 2012 - 17 تله 1391
brain

د فلج سازمان (سټروک انټرنېشنل) مسوولین وايي د دغه درمل پایلې ښې دي، خو لا هم په دې لړ کې نورتحقیق ته اړتیا لېدل کیږي.

د امریکا او کاناډا روغتیا پوهان وايي یو درمل د فلج د مضر اثر د مخنیوي لپاره کارول کیدای شي. د طبي مجلې( لېنسټ نیورولوژي) په رپوټ کې ویل شوي، چې این اې ون(N-A-1) نومي درمل بې ضرره دي. په ۱۵۸ ناروغانو د دغه درمل له ازمېنې وروسته ویل شوي، چې د دې درمل استعمالوونکو ناروغانو د دماغ لږ برخې له فلج نه متاثرې شوې.

د فلج سازمان (سټروک انټرنېشنل) مسوولین وايي د دغه درمل پایلې ښې دي، خو لا هم په دې لړ کې نورتحقیق ته اړتیا لېدل کیږي.

په هغو څېړنو کې چې په بېزوګانو وشوې ثابته شوه، چې کله د دماغ حجرې(ژونکې) ته اکسېجن نه رسیږي، نو (این اې ون) يي د وژل کېدو مخنیوی کوي.

دغه لنډ ټرایل د کاناډا او امریکا په ۱۴روغتونونو کې تر سره شو. په څېړنه کې د برخه اخېستونکو ناروغانوپه دماغ کې د یوه رګ د پاړسوب( اینیورزم) جراحې وشوه. د دغه ډول رګونو د چاودلو احتمال موجود وي، چې له امله یې ناروغان د فلج ښکارکیږي.

۹۲ ناروغانو ته د انجکشن په وسیله دوا ورکړل شوه او ۹۳ کسانو ته یوازې مالګینې اوبه ورکړل شوې. روغتیا پوهان وايي دوی ته معلومه شوه، چې د دغه درمل استعمالول مضر نه دي، ځکه ایله په ۲ کسانو کې د درمل منفي اثر ولېدل شو.

"موږ د داسې هر ډول درملنې هرکلی کوو، چې د فلج له حملې وروسته دماغي حجرې خوندې وساتي. ممکن دغه درمل هیله مند کونکې وي، خو لا هم ډېر تحقیق ته اړتیا ده."

ډاکټر پېټرکولمین

د ناروغانو د دماغ له سکین نه جوته شوه، چې د هغو د دماغونو لږ برخو ته زیان رسېدلی و. ډاکټران وايي له دې تحقیق نه داسې ثبوت جوتیږي چې دماغې حجرې ژغورل کېدای شي.

خو دوی وايي له دې سره سره د درمل د اغېز معلومولو لپاره پراخې څېړنې ته اړتیاده، چې دغه درمل په کې په ډېرو ناروغانو ازمیل شوي وي.

د هیلسینکي پوهنتون پروفیسور مارکو کېسټ وايي د فلج تر ټولو لوی سبب عمر دی. دی وايي دا چې په نړیواله کچه د خلکو د عمرونو حد په ډېرېدو دی، ځکه نو د فلج بار هم ورسره په دروند کېدو دی.

د سټروک نومي سازمان ډاکټر پېټرکولمین وايي موږ د داسې هر ډول درملنې هرکلی کوو، چې د فلج له حملې وروسته دماغي حجرې خوندې وساتي. ممکن دغه درمل هیله مند کونکې وي، خو لا هم ډېر تحقیق ته اړتیا ده.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .