ولې ملا عمر د امریکا هدف نه دی؟

د امریکا د دفاع وزارت وایي چې د ۲۰۱۵ کال د جنورۍ له دویمې نیټې څخه وروسته به د ملا عمر په شمول د طالبانو د تحریک غړي د امریکا د جنګ هدف نه وي او امریکایي ځواکونه به نور له ملاعمر او طالبانو سره په افغانستان کې جنګ نه کوي مګر دا چې هغوی امریکا ته مستقیم ګواښ وګرځي.

‪ د دې خبر له لوستلو سره مې فوراً د پخواني ولسمشر، حامد کرزي وروستی رسمي سفر امریکا ته په یاد شو او کوم مذاکرات او حقایق چې هلته د طالبانو په اړه د امریکا د نوې ستراتیژۍ په هکله څرګند شول.

له نوموړي سفر څخه مخکې، د امریکا د بهرنیو چارو اوسنی وزیر، جان کیري، کله چې د سنا د بهرنیو اړیکو د کمیټې مشر و، ولسمشر کرزي ته یې یوه ورځ په کابل کې د څو تنو محدودو افغان چارواکو په حضور کې وویل چې ‪ملا عمر د پاکستان په کراچۍ ښار کې، د پاکستان د نظامیانو تر ساتنې لاندې دی

پخواني ولسمشر، کرزي فوراً ورته وویل ‪ چې داسې ده امریکا ولې د هغه د نیولو اقدام نه کوي؟ امریکا د هغه پر سرپه میلیونونه ډالر نقدي انعام ایښی دی، په افغانستان کې د هغه په نامه بې ګناه خلک هره ورځ وژل کیږي او د طالب په نامه دلته جګره روانه ده خو ملا عمر ستاسو او د پاکستان د نظامیانو تر نظر لاندې په کراچۍ کې دی؟!‪

جان کيري جمهور رییس کرزي ته قانع کوونکی ځواب نه درلود، خو دا یې وویل چې جنرال کیاني وایي چې ملا عمر زموږ ترنظارت لاندې دی.

امریکې ته د ولسمشر کرزي په وروستي رسمي سفر ‪ ‪ کې (۲۰۱۳، جنوري) د امریکا د امریکا د ملي امنیت پخواني مشاور، توماس ډانیلون د امریکا د استخباراتو د مشر او نورو لویو چارواکو په حضور کې وویل چې له ۲۰۱۵ کال وروسته طالبان د امریکا دښمنان نه دي او امریکا به ددوی پرخلاف نور جنګ نه کوي، خو امریکا به افغانستان کې د تروریزم پرخلاف خپلې جګړې ته لاهم دوام ورکړي.

ولسمشر کزي ته دا عجبه وه چې د امریکاد ملي امنیت مشاور طالبانو ته وخت او کال تعیینوي، چې تر دغه ۲۰۱۴ کال (ډیډلاین) وروسته په افغانستان کې طالبان د امریکا دښمن نه دی، جمهور رییس کرزي وویل، له دغه کال وروسته په افغانستان کې تروریست او تروریزم ستا لپاره څوک او څه دی؟ د امریکا د ملي امنیت مشاور وویل، څوک چې په افغانستان کې زموږ پر سفارت، زموږ پر اتباعو او منافعو باندې برید وکړي او یا له ګواښ سره یې مخامخ کړي.

د طالبانو جامو کې

ولسمشر کرزي وویل، که زموږ په یوه ښار کې په یوه ځانمرګي برید کې ۷۰ یا ۸۰ کسان ووژل شول دا ستاسو لپاره تروریزم دی؟ د امریکا د ملي امنیت مشاور وویل، نه!

جمهور رییس کرزي په دې خاطر چې ځان یې د نوموړي چارواکې له اظهاراتو مطمین کړی وي، یو ځل یې بیا وپوښتل ‪ که د طالبانو په جامو کې څو زره تروریستان د پاکستان څخه افغانستان ته راشي او د افغانستان د خاورې یوه برخه سقوط وکړي، او خپل بیرق پورته کړي بیا؟ د امریکا د ملي امنیت مشاور په ځواب کې وویل دا به ستاسو او پاکستان ترمنځ خپله یوه مسله وي، نه د امریکا.

د دغه سفر په جریان کې د افغانستان د سولې د پروسې او د طالبانو لپاره په قطر کې د دفترپر موضوعاتو باندې مفصلې خبرې وشوې ‪. امریکایي چارواکو د طالبانو لپاره په قطر کې د دفتر پر پرانیستلو باندې ډېر ټینګار درلود او ویل یې چې یوازې د قطر دفتر د مذاکراتو لپاره سم آدرس دی‪

تر دغو مذاکراتو او ملاقاتونو وروسته ولسمشر کرزي له خپل پلاوي څخه تکرارٍاً وپوښتل ‪ امریکا ولې د طالبانو په نمایندګۍ زموږ سره خبري کوي؟

دغه مذاکراتو اود طالبانو په اړه د امریکا موقف، جمهور رییس کرزی لا هم پر امریکا او د تروریزم پرخلاف جګړې باندې مشکوک کړ‪. په هم دې دلیل هغه هم په قطر کې د طالبانو له دفتر او هم یې له امریکا سره د بې شرطه امنیتي سند د امضاء جدي مخالفت وکړ. ‪ د امریکا د متحده ایالاتو اصلي موقف د طالبانو د مشر، ملا عمر په اړه څرګند و‪. دا به ناسمه نه وي که ووایوو چې په تېرو ۱۳ کلونو کې ملا عمر هېڅکله هم د امریکا د جنګ هدف نه و.

امریکا ته د ملا عمر دقیق آدرس او پټنځای له پخوا څخه معلوم و، خو امریکایي ځواکونو هېڅکله هم د هغه د منځه وړلو یا نیولو په اقدام لاس پورې نه کړ.

اوس چې د امریکا د دفاع وزارت رسماً دا تائيدوي چې ملا عمر او نور طالبان په افغانستان کې د امریکې د جنګ هدف نه دي، دا د یوې منظمې او پلان شوې ستراتیژۍ یو نوی پړاو دی‪ که څه هم دا موضوع اوس تازه په مطبوعاتو کې خبرسازه شوې ده، خو د امریکا متحده ایالاتو دا فیصله، د پورتنیو ټکو په اساس کلونه مخکې کړې وه. ‪

څه چې ډېر مهم دي هغه دا چې د امریکا دغه اوسنی اعلان، یو ځل بیا په افغانستان کې د دغه هېواد ۱۳ کلنه جګړه او په سیمه کې جنګي ستراتیژي تر سوال لاندې راولي؛ ولې د ۲۰۱۴ کال کال تر پایه طالبان د امریکا د جنګ هدف وو او سر له ۲۰۱۵ عیسوي کاله څخه نه؟ ولې په تېرو ۱۳ کلونو کې په زرهاوو افغانان د طالب په نامه د امریکا په دغه ناڅرګند جنګ کې ووژل شول او په زرهاوو نور ټپیان او زنداني شول؟ ‪

۱۳ کاله وروسته نن هم بې ګناه افغانان په کابل او د هېواد په نورو ښارونه او سیمو کې تر پخوا په ډېر شمېر د تروریزم قرباني کیږي او د طالب په نامه د دغو تروریستي حملو مسؤولیت هم په غاړه اخیستل کیږي.‪ آیا امریکا ته دا تروریزم او طالب نور تروریست نه دی؟ د ښاغلي ډانیلون هغه څرګندونې اوس د عمل جامه اغوندي.