په دې وسیله کې د غږ اوريدل او ویډیو لیدنه شونې نه ده.

پېلوځی: د ژبو د ورکېدو خطر

هند کې د یو شمېر څېړنیزو ادارو له خوا تر شوې یوه څېړنه ښیي چې دلته په تېرو ۵۰ کلونو کې تر ۲۰۰ ډېرې ژبې له منځه تللې دي.

سروې څرګندوي چې دغه ورکې شوې ژبې د هغو وګړو له خوا ویل کېدې چې کوچیانی ژوند یې کاوه او یا سمندر ته نژدې اوسېدل.

اوس مهال په هند کې له زرو زیاتې ژبې ویل کېـږي.

د دغو ژبو د ورکېدو سببونه ښایي بېلابېل وي. د سمندر پر غاړه اباد خلک اوس نورو سیمو ته کوچېدلي دي.

د کوچیانو د ژوند بڼه هم اوس بدله شوې ده.

بله ستونزه دا وه چې ډېری ورکې شوې ژبې هېڅکله په رسمیت ونه پېژندل شوې.

یو بل دلیل یې ښایي هغه قانون وي چې په ۱۸۷۱ کال کې د برتانوي امپراتورۍ په وخت کې منل شوی و.

د دغه قانون له مخې، په هند کې د ځینو قبیلو سره تړلو وګړیو ته د مجرمانو په سترګو کتل کېدل.

په هند کې له افغان څېړونکي او لیکوال استاد خالق رشید سره مرکه لرو.

ژبه او ناولونه

"یوه شپه دې تېره نه کړه" د عزت صدیق نوی چاپ شوی ناول دی.

په دې ناول کې لیکوال د هغه افغان ژڼي ژوند انځوروي چې له وطنه مساپرۍ ته اړېږي او لوېديځ ته د تګ له پاره په مسکو کې ایسارېږي.

له لانجو او عیاشیو له ډک لنډ ژوند وروسته بېرته وطن ته ستنېږي.

په ناول کې اتل،(ادریس) له سپېڅلي او هغه سړي چې له شرابو یې سخت بد راځی په شرابي او عیاش کرکټر بدلېږي.

د نتاشې، لینې، مایا او نورو روسي نجونو سره تار ځغلوي او زړه ورکوي.

د اصلي کرکتر لومړنۍ مینه(ګلثوک) په خپل وطن کې ورته سترګې په لاره ده.

ادریس یې په پیل کې شپه او ورځ یادوي خو وروسته یې هغه او ټوله کورنۍ له یاده وځي.

په پای کې ادریس پوهېږي چې خطا شوی دی خو ډېر ناوخت وي.

د ليکوال په ګومان ناول د ځینو ريښتیانیو پېښو انځور ورکوي چې ده په خپله لیدلې دي.

خو دا د افغانانو د یوې وړې برخې انځور دی.

اوس په روسیه کې زرګونه افغانان ژوند کوي خو د دوی ادبي هڅې او د خپل کلچر او دودونو ساتنه هسې نه ده چې دوی یې تمه کوي.

په کتاب او په روسیه کې د افغانانو د ژوند د نور څرنګوالي په اړه بحث لرو.

د هالییووډ او چین تر منځ مالي لانجه حل شوه

د امریکا د فلمونو جوړولو صنعت هالییوډ وایی له چین سره داسې هوکړې ته رسېدلي چې له مخې یې چین هغه پيسې بېرته ورکړي چې د یوې نوې مالیې د وضع کولو پر سر پرې ایسارې شوې وې.