ځانمرګی له برید مخکې ووژل شو

د خپريدو وخت: 07:56 گرینویچ - شنبه‬ 02 مارچ 2013 - 12 کب 1391

په كندهار كې سیمه ییز چارواکي وایي د افغان پوځ سرتېرو په ۲۰۵ اتل قول اردو كې يو ځانوژونکی بريدګر هدف ته تر رسیدو مخکې وواژه.

پېښه نن سهار شاوخوا يوولس بجې د كندهار ښار ختیځ لوري هوايي ډګر ته څېرمه ددغه قول اردو په دویم قراول كې رامنځ ته شوه.

د كندهار د والي وياند جاويد فيصل وايي بریدګر چې د افغان پوځ جامې اغوستې وې، غوښتل چې قول اردو ته ننوځي چې د افغان پوځیان له خوا پېژندل شوی او ډزې یې پرې کړې دي.

فیصل وایي، د ګولیو د لګېدو له کبله په بریدګر پورې تړلي چاودېدونکي توکي چاودلي چې له کبله یې د افغان پوځ یو كاركوونكى ټپي شوی.

د وسله والو طالبانو یوه ویاند قاري یوسف احمدي ویلي، په ۲۰۵ اتل قول اردو کې ځانوژونکی برید شوی،خو نور جزییات یې نه دي ورکړي.

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .