پاکستان: د هندي ځواکونو په ډزو کې " ۷ کسان" وژل شوي

د انځور حقوق Getty Images
Image caption د هندي کشمیر په اوړي کې پر امنیتي ځواکونو له برید وروسته د دواړو هېوادونو ترمنځ اړیکي نور هم خراب شول.

د پاکستان د پوځ د عامه اړیکو اداره وايي، هندي ځواکونو د دغه هېواد تر واک لاندې کشمیر په نیلم دره کې ۷ ولسي وګړي وژلي او څلور نور ټپيان کړي دي.

د دې ادارې د خبرپاڼې له مخې، هندي ځواکونو د دې کسانو پر موټر ډزې کړې دي.

پوځ وايي، کله چې امبولانس د ټپیانو د لېږدولو لپاره د پېښې ځای ته ورسېد، بیا هم هندي ځواکونو ډزې پر وکړې.

له دې مخکې هم د پاکستان پوځ ویلي وو، چې هندي ځواکونه د کشمیر په مختلفو سیمو کې ‌ډزې روانې ساتي او په دې بریدونو کې ولسي استوګنځي په نښه کوي.

د دوی په خبره، هند پر شاه کوټ، جورا، بټل، کریلا، باغ او ګرمه چشمه سیمو بریدونه کوي.

پاکستانی پوځ وايي، چې په ځواب کې دوی هم د هندي ځواکونو پوستې په نښه کوي.

* د هند په ډزو کې: ۷ پاکستاني پوځیان ووژل شول

* هندي پوځ کشمیر کې د پاکستاني سرتېرو وژلو ادعا کړې

* هندی لومړی وزیر د کشمیر کارګل ته تللی

د هندي کشمیر په اوړي کې د هندي ځواکونو پر مرکز له برید وروسته د دواړو هېوادونو ترمنځ په کنټرول کرښه تاوتریخوالی زیات شوی او کله کله پکې خلکو ته مرګ ژوبله اوړي.

د تېرې میاشتې په وروستیو کې هم پاکستان هند د شپږو ولسي وګړو پر وژنه تورن کړل او له نوي ډېلي یې وغوښتل چې د اوربند تړون ته درناوی وکړي.

دواړه هېوادونه یو بل د اوربند تړون په خلاف ورزۍ تورنوي.

د ډزو او بریدونو له امله په کنټرول کرښه او شاوخوا سیمو کې ځايي خلک وېرې په مخه کړي او ان ځینې نورو سیمو ته لېږدېدلي دي.

د انځور حقوق Getty Images
Image caption هندي ځواکونه د کشمیر په کنټرول کرښه کې.

اړونده مطالب