ملګري ملتونه: پر خان شیخون ګاز برید د اسد ځواکونو کار و

ر د انځور حقوق Reuters
Image caption په دغه برید کې تر ۸۰ کسان وژل شوي دي.

ملګري ملتونه د بشار اسد ځواکونه د سوریې شمال لوېدیځ کې پر خان شیخون د سارین ګاز د برید مسوول بولي.

دا ښار د حکومت د مخالفو وسلوالو په لاس کې دی.

دا برید د تېر اپرېل پر څلورمه شوی او له امله یې ۸۰ کسان وژل شوي دي.

د سوریې د حکومت مخالفان او لوېدیځ قدرتونه- چې په سر کې یې د امریکا متحده ایالتونه دي- وايي، حکومتي ځواکونو په هغه ورځ دغه سیمه بمبار کړه.

* سوریه کې جنګېدونکي برتانیا مېشت افغان ځوانان

* سوریه کې افغان بندي: د میاشتې په ۶۰۰ ډالر جنګېدم

* سوریه کې له ایراني قومندان سره د یوه افغان جنګیالي وژل کېدل

د بشار اسد په مشرۍ د سوریې حکومت او لوی ملاتړی یې مسکو دا ادعا ردوي او وايي، دا پېښه داسې پلان شوې وه چې د سوریې حکومت پکې ملامت ښکاره شي.

دوی وايي، بم د مخالفو وسلوالو پر داسې مهماتو غورځېدلی چې له کیمیايي وسلو ډک و.

د دې پېښې په تړاو د ملګرو ملتونو دا رپوټ دوو ادارو- د کیمیايي وسلو د مخنیوي ادارې او د (جی ای اېم)د ګډې پلټنې میکانیزم- برابر کړی دی.

په رپوټ کې په پوره باور او پرېکند ډول د سوریې حکومت د خان شیخون ښار د سارین ګاز د برید مسوول بلل شوی دی.

د امریکا هرکلی

د انځور حقوق Getty Images

په ملګرو ملتونو کې د امریکا استازې نېکي هیلي د دې رپوټ هرکلی کوي او په یوه بیان کې وايي، دا رپوټ هغه خبره تاییدوي چې ډېر وخت مخکې امریکا کړې وه.

مېرمن هیلي پر روسیه نیوکه کوي:

"د خپلواکو رپوټونو سره سره موږ وینو چې ځینې هېوادونه د دې رژیم ملاتړ کوي، دا لار باید همدا اوس پرېښودل شي".

مسکو او دمشق تراوسه دې رپوټ ته غبرګون نه دی ښودلی.

روسیې د سې شنبې په ورځ د ملګرو ملتونو د امنیت شورا هغه پرېکړه لیک ونه مانه چې له مخې یې په سوریه کې د کیمیاي وسلو د کارولو د پلټنې لپاره د (جي ای اېم) یواځنيو څېړنو ماموریت اوږېده.