د پېښور ښوونځي برید: د بریدګرو د ملاتړو ضد احتجاجونه

د پېښور ښوونځي برید د انځور حقوق Reuters

د پېښور پر یوه ښوونځي د برید نن درې کاله پوره شوو او ددغه ښار په بېل بېل برخو کې په دغه برید کې د وژل شويو درېیم تلین لمانځل شوی دی. د پاکستان لومړي وزیر شاهد خاقان عباسي ویلي، د پېښور د یاد ښوونځي د قربانیانو وینې يې هېري نه دي او ''ترهګر به ځپي. ''

درې کاله وړاندې له هغې پېښې وروسته د پاکستان سیاسي او پوځي مشرتابه د 'ترهګرۍ ضد ملي کړنلاره ' اعلان کړه، چې د حکومت په خبره تردې کړنلارې وروسته يې وسله وال سخت دریځي ځپلي، خو نیوکه کوونکي لاهم د دغه هېواد استخبارات د وسلوالو ډلو پر پټ او ښکاره ملاتړ تورنوي.

د پېښور په شمول د پاکستان په شاوخوا ټولو لویو ښارونو کې د پېښور ښوونځي د قربانیانو درېیم تلین لمانځل شوی او فعالانو د قرباني شویو په یاد کې شمعې بلې کړې.

پاکستان کې د ماشومانو په ټولوژنې ملي ماتم دی

پېښور ښوونځي کې د وژل شویو کسانو تلین ولمانځل شو

په پېښور کې په دغو لاریونونو کې ډېری فعالانو د وسله والو سخت دریځو د ملاتړو ضد شعارونه ورکول او هغوی يې د پاکستان خاینان وبلل. دې احتجاج کوونکو له دې سره چې د دې پېښې د عدالتي پلټنو خواست يې کاوه، د وسلوالو ډلو ضد هم شعارونه ورکړل.

د پاکستان لومړي وزیر شاهد خاقان عباسي د پېښور ښوونځي د قربانیانو په تړاو په خپل پېغام کې ویلي، ۱۶ ''م ډیسمبر به نه یواځې په پاکستان بلکې په ټوله نړۍ کې د تورې ورځې په حیث لمانځل کېږي، '' ځکه چې د ده په وینا ''ترهګرو د پاکستان راتلونکی کهول وژلی دی. ''

د پېښور پر همدې ښوونځي برید کې تر ۱۴۵ زیات کسان وژل شوي و، چې ۱۳۰ يې ماشومان زده کوونکي و. ددغه برید مسوولیت پاکستاني طالبانو منلی و. د یادې وسلوالې ډلې پخوانی ویاند احسان الله احسان چې اوس د پاکستان پوځ ته تسلیم شوی، احتجاج کوونکو يې په دار د ځړولو غوښتنه کوله.

د پېښور یوې فعالې پلوشه عباس هم د نن په دې احتجاجونو کې ګډون درلود. اغلې عباس وايي، د همدې احتجاجونه له لارې له واکمنو خواست کوي، چې د هر وژل شوي زده کوونکي په نامه دي په پښتونخوا کې ښوونځي جوړ کړل شي.

د انځور حقوق AFP

د پاکستان سیاسي او پوځي مشرتابه د ۲۰۱۴م عیسوي کال تردې خونړۍ پېشې وروسته 'د ترهګرۍ ضد د قامي کړنلارې ' اعلان وکړ او اوس ادعا کوي، چې تردې کړنلارې وروسته يې د سخت دریځو وسله والو ډلې ځپلې او امنيت يې ښه کړی دی.

خو په نني احتجاج کې شریک یو بل فعال شفیق ګګیاڼی وايي، د ترهګرۍ ضد د پاکستان تر قامي کړنلارې وروسته هم دغه ډلې ځپل شوې نه دي.

د پېښور د یاد ښوونځي په یاد کې د پاکستان په شاوخوا ټولو لویو ښارونو کې فعالانو سوله ییز لاریونونه کړي او د پېښې د قربانیانو په یاد کې يې شمع بلې کړې. له دې سره ددغه هېواد شاوخوا ټولو رسنیو هم دې ورځې ته ځانګړی خبري پوښښ ورکړی دی.