نقیب مسید وژل کېدو قضیه: پولیس افسر راو انوار له دندې ګوښه شوی

راو انوار د انځور حقوق EPA
Image caption پولیس افسر راو انوار ادعا کړې، چې پولیسو د نقیب الله لټون کاوه، چې په وینا یې ''د نسیم الله په نامه یې پېژند پاڼه یا شناختي کارډ جوړ کړی و او له دیره اسماعیل خان سیمې کراچۍ ته د اوسېدو لپاره تللی و.''

کراچۍ کې هغه پولیس افسر له دندې ګوښه شوی، چې ادعا یې کوله نقیب الله مسید پولیسو سره متقابلو ډزو کې وژل شوی دی. د پېښې څېړونکې کمېټۍ په سپارښتنه د کراچۍ ملیر سیمې پولیس افسر راو انوار له دندې ګوښه شوی.

راو انوار مخکې ادعا کوله، چې نقیب الله مسید د وسله والو طالبانو ملګری و او پولیسو سره مخامخ ډزو کې وژل شوی دی. خو له پېښې وروسته پر خواله رسنیو پراخ غبرګونونه راپورته شول او د نقیب الله مسید خپلوانو ادعا وکړه، چې نوموړی پولیسو د کراچۍ سهراب ګوټ سیمې له یوه رستورانته بېولی و او وروسته یې مړی وموندل شو.

د نقیب الله مسید خپلوانو تور پورې کړ، چې نقیب مسید مزدوري کوله، له سخت دریځو سره یې هېڅ اړیکه نه وه او پولیسو بې محاکمې وژلی دی.

د سند کورنیو چارو ایالتي وزیر د نقیب مسید وژنې څېړنه اعلان کړه او د ترهګرۍ ضد ادارې یو مشر ثناالله عباسي په مشرتابه یې څېړنیزه کمېټه جوړه کړه. اوس دغې کمېټې ویلي، د پولیس افسر راو انوار له لوري پر نقیب مسید لګول شوي تورونه بې بنسټه دي.

بل لور ته د پاکستان سترې محکمې رییس د پېښې په تړاو له سند پولیسو غوښتي، چې یوه اوونۍ کې بشپړ معلومات ورکړي.

د نقیب مسید یوه خپلوان نور رحمان بي بي سي ته د ټیلیفون له لارې ویلي و:

''هغو پولیسو چې رسمي کالي یې نه و اغوستي، نقیب د سهراب ګوټ سیمې له شیراغا رستورانته د جنورۍ پر دویمه شپه له ځان سره بیولی و او موږ پرې څلور ورځې وروسته خبر شوو. ''

بل لور ته پولیس افسر راو انوار ادعا کړې، چې پولیسو د نقیب الله لټون کاوه، چې په وینا یې ''د نسیم الله په نامه یې پېژند پاڼه یا شناختي کارډ جوړ کړی و او له دیره اسماعیل خان سیمې کراچۍ ته د اوسېدو لپاره تللی و. ''

راو انوار وايي:

''د نسیم الله په نامه یې ولې شناختي کارډ جوړ کړی و او له هغو مجرمانو سره یې یو ځای څه کول، چې ورسره ووژل شو؟ ''

د نقیب الله خپلوان وايي، لومړی یې یوه کارخانه کې مزدوري کوله، وروسته یې غوښتل د ټوکرانو دکان وکړي، درې ماشومان یې درلودل، چې عمرونه یې د دوو او نهو کلونو تر منځ دي او دا مهال یې کورنۍ دیره اسماعیل خان کې ده.

'پولیسو سره ډزو کې' د نقیب الله مسېد وژل کېدو پېښې څېړنې امر

په کراچۍ کې د نقیب مسید وژنې پر خواله رسنیو غبرګونونه پارولي

د نقیب الله مسید له وژل کېدو وروسته د کراچۍ او پېښور په ګډون بېلا بېلو ښارونو کې مظاهرې شوې او مظاهره کوونکو ادعا کړې، چې پولیسو نوموړی بې محاکمې وژلی دی.

د انځور حقوق FACEBOOK
Image caption نقیب الله مسید د فوټو ګرافي شوقین و او د ماډلز انداز یې درلود

کراچۍ کې له دې مخکې هم د بې محاکمې وژنو شکایتونه شوي دي.

د پاکستان بشري حقونو کمېسیون رپوټ کې ویل شوي، چې پولیسو او نورو امنیتي ځواکونو تېر کال دغه ښار کې ۱۴۶ کسان وژلي دي، چې دوی نه د ۱۴۰ کسانو په تړاو ادعا شوې، چې مخامخ ډزو کې وژل شوي دي.

اړونده مطالب

ورته مطالب