د نقیب مسید وژنې یوازینی شاهد تري تم شوی

نقیب مسید د انځور حقوق SOCIAL MEDIA

د شنبې پر ورځ د پاکستان کراچۍ کې ترهګرۍ ضد محکمې ته د وزیرستان وژل شوي ځوان نقیب مسید قضیې لړ کې پلټونکي افسر ‌‌‌‌‌‌ډاکتر رضوان له خوا رپوټ سپارل شوی چې وايي، د دغې قضیې یوازینی عیني شاهد یا ګواه تري تم کړل شوی او هیڅ مالومات یې نه شته.

محکمې ته وړاندې شوي رپوټ کې دا هم ویل شوي، چې د تورن افسر راو انوار په ګډون پېښه کې تورن افسران زورواکي دي او د دوی له ډاره عیني شاهد له مخکې لا له شاهدي ورکولو لاس پر سر شوی دی.

رپوټ وايي، د فراري پولیس افسرانو په اړه یې پلټنه بشپړه کړې ده او داسې احتمالي خطر شته، چې د نیول شویو افسرانو له ډاره شاهدان له شاهدۍ ورکولو پر شا شي.

د ترهګرۍ ضد محکمې نقیب مسید بې ګنا وباله

اسلام اباد کې د نقیب مسید د وژنې ضد احتجاج

‌‌ډاکتر رضوان چې خپله د سند پولیسو یو افسر دی عدالت نه یې خواست کړی چې نور دې د را‌و انوار او د هغه د ملګرو ضمانت له منلو تېر شي، ځکه په وینا یې که محکمه بیا بیا د دوی ضمانت مني نو بیا ګواهان خپله خبره بدلولی شي.

محکمې د قضیې څېړونکي افسر ‌‌‌‌‌‌ډاکتر رضوان رپوټ منلی او په رسمي توګه یې د راو انوار او د هغه ملګرو تورنولو لپاره د فبرورۍ نهمه نېټه ټاکلې ده.

نقیب مسید د ۲۰۱۸ کال جنورۍ پر ۱۳ د کراچۍ په شاه لطيف سیمه کې د پولیسو لخوا د ترهګرۍ په تور له دریو نورو ملګرو سره وژل شوی و.

د نقیب مسید له وژل کېدو وروسته ټول پاکستان کې مظاهرې پیل شوې او اسلام اباد کې د مختلفو سیمو پښتنو لس ورځې پرلت وکړ.

د انځور حقوق AFP
Image caption د نقیب مسید له وژل کېدو وروسته ټول پاکستان کې مظاهرې پیل شوې

راو انوار له مظاهرو وروسته ونیول خو وروسته په ضمانت سره خوشی شو. تېرو ورځو کې راو انوار له هېواد د وتلو وړاندیز کړی و، خو محکمې ونه مانه.

اسلام اباد کې د پښتنو پرلت سره د منظور پښتین په مشرۍ د پښتون ژغورنې غورځنګ پیل شو، چې له هغه راهیسې د خپلو حقونو لپاره په مختلفو سیمو کې مظاهرې کوي.

سږ کال د تېرې میاشتۍ وروستیو کې بیا د پاکستان کراچۍ کې د ترهګرۍ ضد محکمې په ترهګرۍ، وسله او باروتو لرلو په تور وژل شوی نقیب الله مسید بې ګنا وباله.