پاکستان؛ پر خواله رسنیو د 'زه هم افغان یم' کمپاین ناندریز شوی

فرشته مومنده لومړی تښتول شوې او تر جنسي تېري وروسته وژل شوې وه، د انځور حقوق ISLAMABAD POLICE
Image caption فرشته مومنده لومړی تښتول شوې او تر جنسي تېري وروسته وژل شوې وه

د پاکستان پلازمېنه اسلام اباد کې د یوې لس کلنې پښتنې نجلۍ پر وژنه په پاکستان کې د اعتراضونو لړۍ روانه ده، او اوس خبره پر خواله رسنیو تر کمپاین او هشټګونو رسېدلې.

فرشته مومنده لومړی تښتول شوې او تر جنسي تېري وروسته وژل شوې وه، چې پنځه ورځې وروسته یې د تېرې دوشنبې پر ورځ 'مې ۲۱ مه 'خراب شوی مړی وموندل شو.

په دغو اعتراضونو کې د پښتون ژغورنې غورځنګ مخکښه ونډه لري چې له امله یې پرې یو شمېر پاکستاني رسنیو تور لګولی چې پېښې ته د قومي رنګ په ورکولو سیاسي ګټنه غواړي.

لس کلنه ماشومه اسلام اباد کې له جنسي تېري وروسته وژل شوې

د فرشتې وژنه: عمران خان د دوو پولیس افسرانو دنده ځنډولې

یو ځایي ټلوېزیون غورځنګ په دې تور کړی چې د فرشتې پېښه یې ځکه مخکې کړې چې کورنۍ یې د افغانستان ده.

د غورځنګ غړو او ځینې نورو فعالانو پر دې تورونو سخت غبرګون څرګند کړ او پر خواله رسنیو د یاد ټیلويزیون پر ضد سخت غبرګونونه څرګند شول او پر ټيوټر له دغه ټیلويزیون سره د پرېکون او 'زه هم افغان یم' هشټګ تر ټولو زیات وو.

د غورځنګ غړی محسن دوړ وايي، د فرشتې پېښې ته توکمیز رنګ دوی نه بلکې د پاکستان واکمنو ورکړی دی.

ښاغلي دوړ دې لړ کې پر ټویټر لیکلي، '‌زه افغان وم،‌ افغان یم او افغان به وم '

غورځنګ فعالې ثنا اعجاز پر ټویټر پاڼه د زه هم افغانه یم له هشټګ سره لیکلي:

''افغان مورنۍ خاورې زما نیکونه زېږولي، ما ته یې تر زرګونو کلونو پورې کلتور، مدنیت، تاریخ، اتلان او پېژندګلوي راکړي، موږ د خپلې پېژندګلوۍ حق لرو او تل به پر خپل افغانیت ویاړو.''

مالک اڅکزی وايي:

''زموږ افغانیت یو تاریخي حقیقت دی او له همدې کلتور، جغرافیې، مدنیت او اتلانو سره د زرګونو کلونو تاریخي اړیکي او پېژندګلوي څنګه بدلېدای شي. ''

د پښتون ژغورنې غورځنګ یوې بلې مخکښې فعالې وړانګې لوڼۍ لیکلي:

''تر کلونو پورې معمولاً ټولو پاکستاني خبري چېنلونو د پښتنو په کلتور او ژبه پورې ملنډې وهلې او دوی یې د ترهګرو په بڼه وړاندې کړي دي. د پي ټي ایم له رامنځته کېدو وروسته دوی داسې کمپاین پیل کړ چې ګواکې پښتانه د بهرنیانو اجنټان وښيي او اوس د فرشتې کورنۍ ته پیغورونه ورکوي. دا د ښمنۍ رویه ده.''

خو د غورځنګ د فعالانو پر دې ټویټونو سختې نیوکې هم شوې دي، او د خواله رسنیو ګڼ شمېر کاروونکو دوی خاینان او د پاکستان دښمنان بللي. دغو ټویټونو ته په ډېریو ځوابونو کې لیکل شوي چې که څوک ځان افغان بولي نو بیا دې افغانستان ته ولاړ شي.‌

پاکستانۍ فعاله فرزانه باري وايي، دغه ډول پېښو ته توکمیز رنګ ورکول بده خبره ده، او که د غورځنګ غړیو په دې احتجاج کې ګډون کړی وي، نو دا د پاکستان د ملي اسمبلۍ د غړي په حیث پر دوی د خپلې سیمې د غړيو حق دی.

خبریال ضرار کهوړو په خپل ټویټر پیغام کې وايي، ''که څوک فکر کوي چې دا توکمیزه موضوع ده، دا ناسم فکر دی، دغې ناروغۍ زموږ ټولنه کې جرړې موندلې دي او موږ د دې ناورغۍ د علاج لپاره کومه هڅه هم نه ده کړې.''