پاکستان: دوو بریدونو کې لس پاکستاني پوځیان وژل شوي دي

د انځور حقوق AFP

پاکستان کې دوو جلا بریدونو کې د وژل شویو پوځیانو شمېر لسو کسانو ته رسېدلی دی. د پاکستاني پوځ رسنیز دفتر له لوري ویل شوي وژل شویو کې د یوه تورن په ګډون لس پوځیان شامل دی.

د پاکستان لومړي وزیر عمران خان د پوځیانو وژل کېدو پر دغه پېښه خواشیني څرګنده کړې او د قربانیانو له کورنیو سره یې خواخوږي څرګنده کړې ده.

د پوځ رسنیز دفتر (ای ایس پي ار) له لوري ادعا شوې، د شنبې پر ورځ شمالي وزیرستان کې هغو بریدګرو شپږ پاکستان پوځیان وژلي چې له افغانستانه راغلي وو.

پاکستان: دوو بریدونو کې لس پاکستاني پوځیان وژل شوي دي

امریکا 'د پاکستان بلوڅ خپلواکۍ پوځ' ترهګره ډله وبلله

پر پاکستاني پوځیانو یو بل برید بلوچستان کې شوی دی، چې د چارواکو په خبره وسله والو پر ایف سي نومې ملېشه ځواک ډزې کړې. د وزیرستان برید مسوولیت پاکستاني طالبانو منلی او وايي، دغه برید کې دوی ته زیان نه دی رسېدلی.

د بلوچستان برید مسوولیت د بلوڅان بېلتون غوښتونکي تنظیم بلوچستان لبرېشن فرنټ (بي ایل ایف) منلی دی.

د روانې جولای میاشتې پیل کې امریکا متحدو ایالتونو د یوه اعلان له مخې، د بلوچستان خپلواکۍ پوځ يا بي اېل اې په نامه ډله د پاکستان په بلوچستان او نورو سیمو کې د بریدونو له امله یوه ترهګره ډله وبلله.

په دې اړه د امريکا د بهرنيو چارو د وزارت په خپره شوې وينا پاڼه کې راغلي و چې امريکا کې د دغې ډلې ټوله شتمني کنگل شوې او ورسره د امريکايي وگړو پر راکړې ورکړې بنديز لگېدلى.

د پاکستان د سولې مطالعاتو مرکز د سږ کال لومړیو کې په خپل کلني رپوټ کې وویل، د پاکستان بلوچستان صوبه کې د ۲۰۱۷ کال پرتله په ۲۰۱۸ کال کې د ترهګرۍ پېښې ۲۳ سلنه ډېرې شوې دي، خو په خبره یې نور پاکستان کې دا ډول پېښې ۲۹ سلنه کمې شوې دي.

د دغه رپوټ له مخې د پاکستان طالبانو غورځنګ سره تړلو ډلو د ۲۰۱۸ کال د ډېرو ترهګریزو بریدونو مسوولیت منلی او ور پسې بلوڅ بېلتونپالې ډلې هم دې پېښو کې ښکېلې دي.

د ۲۰۱۸ کال بله پرمختیا دا ده چې وسلوالو بلوڅو بیلتون پالو ډلو لومړی ځل لپاره دوه ځانمرګي بریدونه وکړل.