پېښور کې د امریکا کونسلګرۍ ته څېرمه بمي چاودنه شوې

د خپريدو وخت: 06:41 گرینویچ - دوشنبه 03 سپتمبر 2012 - 13 وږی 1391
peshawer

پولیس وايي په چاودنه کې یو لاروی کس هم وژل شوی

د خیبر پښتونخوا ایالت په مرکزي ښار پېښور کې یوه ځانوژونکي برید ګر هغه مهال ځان او دوه تنه نور ووژل، چې له باروتو ډک موټر يي د امریکا د کونسلګرۍ له ګاډي سره ټکر کړ.

امریکايي چارواکي وايي د کونسلګرۍ هیڅ یو امریکايي کاروکونکی په دې برید کې نه دی وژل شوی، خو په خبره يې د کونسلګرۍ دوه پاکستاني او دوه امریکايي کارکونکي ټپیان شوي دي.

له دې مخکې د پاکستان داطلاعاتو ایالتي وزیر ویلی و، چې په دې برید کې دوه تنه امریکایان وژل شوي دي. په دې برید کې د ټپي شویو کسانو شمېر نولس تنه ښودل شوی دی.

په سیمه کې د بي بي سي یو خبریال وايي په وژل شویو کې یو لاروی هم شامل دی.

له چاودنې وروسته د امریکا سفارت په یوه خپره کړې ویناپاڼه کې چاودنه تایید کړې ده، خو وايي چې د کونسلګرۍ دوه امریکايي او یو پاکستانی کارکوونکي په کې ټپیان شوي دي.

ویناپاڼه وايي، چې د لانورو معلوماتو لپاره اوس پلټنه کوي.

ځايي پولیس وايي داسې معلومیږي، چې دا یو ځانوژونکی برید و، خو تر اوسه پورې په دې اړه کره معلومات نه شته.

د پولیسو په خبره چاودنه د امریکا د کونسل په یوه لنډ کروزر ډوله ګاډي شوې ده چې په کې یو بهرنی کس او ډرېور يې وژل شوي دي، خو پولیس دا ونه ویل چې وژل شوی کس د کوم هېواد دی.

پولیس دا هم وايې چې په دې چاودنه کې یو بل ګاډی هم ویجاړ شوی.

دغه چاودنه په یونیورسټي ټاون سیمه کې شوې ده، چې د یو شمېر بهرنیو موسسو دفترونه په کې موقعیت لري. په دې سیمه کې له دې مخکې هم په بهرنیانو ورته بریدونه شوي دي.

په پېښور او هاخوا سیمو کې يې د سږ کال په اوږدو کې د خونړیو بمي چاودنو وروستۍ پېښه د تېرې جمعې په ورځ په متنو سیمه کې د یوه جومات څنګ ته وشوه.

په هغه موټر بم چاودنه کې چې د پېښور ښار جنوب ته په پنځه وېشت کیلومترۍ کې وشوه یوولس تنه وژل شوي وو او څوارلس نور ټپیان شوي ول.

د متنیو بازار د پېښور سویل ته د دره آدم خیل په خوا کې موقعیت لري. د دغه بازار په منځ کې هغه لویه لارتېره ده، چې د پښتونخوا سویلي سیمې له پېښور ښار سره نښلوي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .