بلوچستان کې چاودنې شیعه ګان وژلي

د خپريدو وخت: 05:56 گرینویچ - چارشنبه 19 سپتمبر 2012 - 29 وږی 1391
attack

بس د ایران له تافتان نه کوټې ته پر لاره و چې چاودنه پرې وشوه

د پاکستان په بلوچستان ایالت کې د شیعه زیارت کوونکو په بس د بمي برید په پایله کې درې تنه ووژل شول او نهه تنه نور ټپیان شول.

د برتانوي خبري اژانس رویټرز په رپوټ کې ویل شوي، چې دغه بس د ایران څخه کوټې ته ستنېده چې په مستونګ سیمه کې يي پرې چاودنه وشوه.

د ځايي پولیس په وینا دغه پېښه د ایالت له مرکزي ښار کوټې څخه پنځه وېشت کیلومتره لرې په سویل کې رامنځ ته شوه.

د ځايي چارواکو په خبره دوی تحقیقات پیل کړي، چې معلومه کړي چاودنه بمي وه او که دا یو ځانمرګی برید و.

په چاودنه کې د امنیتي ځواکونو درې تنه هم ټپیان شوي دي، چې د بس د ساتنې لپاره په بل ګاډي کې د بس تر څنګ روان و. په بلوچستان کې له دې مخکې هم په اهل تشیع وګړو ورته بریدونه شوي دي.

له دې مخکې د کوټې تافتان تر منځ د غځېدلي سړک په اوږدو کې له کوټې څخه ایران ته په تلونکو او یا هم له هغه ځايه په بېرته ستنېدونکو شیعه ګانو دغه ډول بریدونه شوي دي.

د دغه ډول اکثر بریدونو مسوولیت د لشکر جهنګوي نومي توند لارې ډلې منلی دی. په دې سربېره په کوټه ښار کې هم په ځايي شیعه مسلکه اوسېدونکو وسله وال بریدونه شوي دي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .