"پر لال جومات د برید مسوول جنرال مشرف دی"

د خپريدو وخت: 13:13 گرینویچ - شنبه‬ 09 فبروري 2013 - 21 سلواغه 1391
افتاب احمد خان شیرپاو

شیرپاو وايي پر لال جومات عملیات پرویز مشرف او شوکت عزیز کنټرولول.

د پاکستان د کورنیو چارو پخوانی وزیر او د قومي اسمبلۍ غړی افتاب احمد خان شیرپاو وايي په ۲۰۰۷ میلادي کال کې پر لال جومات د عملیاتو مسوولیت د پخواني پوځي ولسمشر جنرال پرویز مشرف او پخواني صدراعظم شوکت عزیز په غاړه دی.

ښاغلی شیرپاو وايي په لال جومات کې د سخت دریځو کسانو پرضد په عملیاتو کې د کورنیو چارو وزارت او د ملکي استخباراتو ادارې ته ونډه نه وه ورکړل شوې.

د پاکستان د کورنیو چارو پخواني وزیر دغه څرګندونې هغه کمیسیون ته کولې چې پر لال جومات د شویو عملیاتو په هکله څیړنې کوي.

ښاغلي شیرپاو وویل پر لال جومات عملیات پخواني پوځي ولسمشر جنرال پرویز مشرف او د هغه وخت صدراعظم شوکت عزیز کنټرولول.

د هغه په وینا، د پاکستان د کورنیو چارو وزارت ته د هغه پلاوي په هکله هم معلومات نه وو ورکړل شوي چې له مولانا عبدالعزیز او مولانا عبدالرشید غازي سره د خبرو لپاره جومات ته ورغلی و.

ښاغلي شیرپاو زیاته کړه، چې په لال جومات کې د سخت دریځو پرضد عملیات په دې خاطر په ورو پرمخ بېول کېدل چېو دغه مساله په سوله ییزه توګه حل شي.

"امنیتي کسانو هغه مهال د لال جومات خطیب مولانا عبدالعزیز ونیو، چې په چادرۍ کې یې د تېښتې هڅه کوله."

د کورنیو چارو پخوانی وزیر وايي له عملیاتو وروسته د ورکو شویو کسانو په اړه هغه ته معلومات نه وو ورکړل شوي او کله چې مولانا عبدالعزیز ونیول شو، د دې پر ځای چې په زندان کې وساتل شي په یوه ارماګاه کې له خپلې ښځې سره ساتل کېده.

تراوسه پورې له ۱۰۰ نه ډېرو کسانو د لال جومات د عملیاتو په اړه له هغه کمیسیون سره خبرې کړي چې د لال جومات د عملیاتو پلټنې کوي.

سترې محکمې دغه کمیسیون ته امر کړی چې په دوه نیمو میاشتو کې خپلې پلټنې بشپړې کړي.

د یادولو ده، چې امنیتي کسانو هغه مهال د لال جومات خطیب مولانا عبدالعزیز ونیو، چې په چادرۍ کې یې د تېښتې هڅه کوله.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .