شمالي وزيرستان کې ډرون پر خالي کور بريد کړی

Image caption امريکا دفاع وزارت وايي په دغو بريدونو کې ۲۲۲۷ کسه وژل شوي دي

د پاکستان د قبايلي سيمې شمالي وزيرستان ځايي چارواکي وايي، چې د پنجشنبې په شپه د امريکا بې پيلوټه الوتکې په ميرانشا کې په خالي کور بريد کړی دی.

تر دې وړاندې حکومتي سرچينو ويلي وو، چې په شمالي وزيرستان کې پر يوه کور د ډرون په يوه بريد کې لږترلږه درې کسه وژل شوي دي.

حکومتي سرچينې وايي دغه بريد د ميرانشاه له مرکزي بازار سره په خوا کې پر يوه کور شوی او بې پيلوټه/ ډرون الوتکې پرې دوه توغندي توغولي.

د بې پيلوټه دغه بريد امريکا ته د پاکستان د لومړی وزير نواز شريف له سفره ټيک يوه اوونۍ وروسته ترسره کېږي.

ښاغلي شريف په دغه سفر کې د امريکا له ولسمشر بارک اوباما نه وغوښتل، چې په پاکستان کې دې د ډرون حملې بندې کړي.

تر دې وړاندې د سپتمبر پر ۳۰مه په ميرانشا کې يوه ډرون بريد دوه کسه ووژل.

نژدې دوه اوونۍ وړاندې د بشري حقونو دوو نړیوالو سازمانونو په پاکستان او يمن کې د ډرون بريدونه وغندل.

د دوی په ګډ راپور کې راغلي و، چې په دغو بريدونو کې زيات ولسي وګړی وژل کېږي او يا هم ټپيان کېږي.

د پاکستان حکومت په وروستیو کلونو کې بيا بيا د ډرون بريدونو مخالفت کړی او دريځ يې دا دی چې دا وړ بريدونه د هېواد د خپلواکۍ او ځمکنۍ بشپړتيا خلاف دي.

اسلام اباد وايي د دې پر ځای چې ډرون بريدونه په پاکستان او سيمه کې ترهګري له منځه يوسي، برعکس لا يې پياوړې کوي.

د امريکا د دفاع وزارت د شمېرو له مخې د پاکستان په قبايلي علاقو کې له ۲۰۰۸ نه ۲۰۱۳ کاله ټولټال ۳۱۷ بريدونه شوي دي.

وزارت وايي په دغو بريدونو کې ۲۲۲۷ کسه وژل شوي چې ۲۱۶۰ يې تندلاري او ۶۷ يې ولسي وګړي دي.

خو د بښنې د نړيوال سازمان او د بشري حقونو د څار سازمان په ګډ راپور کې ویل شوي و، چې په دغو بريدونو کې له ۴۰۰ زيات ملکيان وژل شوي دي.

ورته مطالب