بلوچستان ايالت کې د ګوزن نوې پېښه تاييد شوې

د انځور حقوق AP
Image caption کوټه، قلعه عبدالله او ژوب هغه سيمي دي چې د پولیو پېښې په کې ثبت شوي دي

د پاکستان په بلوچستان ايالت کې د ګوزڼ نوې پېښه تاييد شوې او په دغه ايالت کې دوه ماشومان د شري له امله مړه شوي دي.

د بلوچستان د روغتيا اداره وايي د ګوزڼ دغه پېښه له افغانستان سره پر پوله نژدې د قلعه عبدالله په ولسوالۍ کې شوې ده.

ډاکټران وايي په ۱۴ مياشتني ماشوم کې د پوليو نښې ليدل شوې وې او پلازمېنې اسلام ته استول شويو ازموينو وښوده چې دغه ماشوم د پوليو په ويروس اخته دی.

د ګوزڼ د دغې نوې پېښې په تاييدېدو سره په بلوچستان ايالت کې سږ کال په پوليو د اخته ماشومانو شمېر ۱۲ ته ورسېد.

کوټه، قلعه عبدالله او ژوب هغه سيمي دي چې د پولیو پېښې په کې ثبت شوي دي.

بل خوا د بلوچستان ايالت په لسبيله ولسوالۍ کې چې کراچۍ ته ورڅېرمه پرته ده د شري ناروغۍ دوه ماشومان وژلي دي.

دغلته د ځايي روغتون چارواکو بي بي سي ته ويلي په دغه سيمه کې له ۲۰ ډېر ماشومان د شري له ناروغۍ اغېزمن شوي دي.

د هېواد د نورو ايالتونو برعکس په بلوچستان کې تر اوسه ماشومانو ته د شري واکسين ورکولو کمپاین نه دی پيل شوی او دې د ماشومانو ژوند له خطر سره مخامخ کړی دی.

د دې کال په لومړيو کې د بلوچستان چارواکو ادعا وکړه، چې بلوچستان له پوليو نه پاک شوی، خو په تېرو درې څلورو مياشتو کې يو ځلې بيا د پوليو پېښې وشوې.

چارواکي وايي د هغو ماشومانو ميندو پلرونو خپلو ماشومانو ته د پولیو واکسين د څاڅکو له ورکولو ډډه کړې چې اوس پرې اخته شوي دي.

د بلوچستان په ۱۱ ولسواليو کې د نومبر له ۱۰مې تر ۱۲مې پورې د پولیو واکسين کمپاين عملي شوی دی.

په دغه کمپاين کې د يو ميليون او ۳۰۰ زره زیاتو ماشومانو واکسينول هدف ټاکل شوی وو.

ورته مطالب