د پاکستان قبايلي سيمو کې څلور غير مسلمان ملکان

د انځور حقوق Getty
Image caption د خيبر پښتونخوا د مشر حکومتي چارواکي له لوري د خيبر ايجنسۍ څلورو غير مسلمانو وګړو ته د قبايلي ملک يا مشر درجه ورکړای شوه

د پاکستان په قبايلي سيمو کې د لومړي ځل لپاره نامسلمانو وګړو ته د ملکانو يا ځايي مشرانو په توګه واک ورکړای شوی دی.

له دې وروسته به مسيحي او سک لږکي کولای شي د ملکانو په توګه وټاکل شي.

لږکيو د دې ګام هرکلی کړی او دا يې د لږکيو د حقونو په برخه کې يو مثبت پرمختګ بللی دی.

له پېښوره زموږ خبريال رحمان الله په خپل راپور کې کاږي، د پاکستان قبايلي اوسېدونکو د ځايي حکومت له لوري لږکيو ته د ملک يا مشر درجې ورکولو پرېکړې هرکلی کړی دی.

په قبايلي سيمو کې د لږکيو استازو ويلي چې د هېواد په تاريخ کې دا لومړی ځل دی چې د نورو مذهبونو سره د تړاو لرونکي د قبايلو يوه برخه شوه او په دې سره توپيري چلند پای ته ورسېد.

د خيبر پښتونخوا د مشر حکومتي چارواکي له لوري د خيبر ايجنسۍ څلورو غير مسلمانو وګړو ته د قبايلي ملک يا مشر درجه ورکړای شوه.

د دغو څلورو کسانو دوه يې په مسيحي لږکيو او دوه نور يې په سکانو پورې تړاو لري.

دغو قبايلو ته به تر دې وروسته د نورو قبايلي وګړو په څېر حقونه ورکول کېږي.

يو مسيحي چې اوس د ملک درجه ورکړای شوې بي بي سي ته ويلي د ځايي حکومت په دې پرېکړې ټولو قبايلي لږکيو خوښي څرګنده کړې ده.

ده ويلي دا غوښتنه يې لا له وړاندې درلوده چې د نورو قبايلو په څېر لږکيو ته د ملک د درجې ترڅنګ پګړۍ هم ورکړای شي، چې حکومت يې بلاخره غوښتنه ومنله.

د لږکيو دغه نوي قبايلي ملک ويلي وړاندې به يې د لږکيو د پاسپورت او يا پېژندپاڼې د فورمو تاييدولو لپاره نورو قبايلي مشرانو ته ورتلل، خو اوس به دا کار دوی پخپله کوي.

ده ويلي چې لږکي اوس د قبايلو يوه برخه ده او توپيري چاپيريال او چلند نور پای ته رسېدلی.

د پاکستان جوړېدو راهيسې په قبايلي سيمو کې سکان، هندوان او مسيحيان دېره دي.

د اورپکۍ ضد جګړه کې د نورو قبايلو ترڅنګ لږکي هم اغېزمن شوي او يو شمېر يې اړ شوي چې خپل کورکلی پرېږدي او ښارونو ته کډه شي.

د دوی ډېری د پېښور ترڅنګ پنجاب ايالت ته هم تللي دي.

ورته مطالب