بلوچستان کې اته "اورپکي" وژل شوي

د انځور حقوق BBC World Service
Image caption پوليس وايي په دغو سيمو کې وړاندې هم نښتې شوې دي

پاکستاني چارواکي وايي د بلوچستان په سبي کې د امنيتي ځواکونو د پلټنې په عملياتو کې اته "اورپکي" وژل شوي او ۱۲ نور نيول شوي دي.

د بلوچستان حکومتي سرچينو ويلي دغه عمليات د سبي په سانګان سيمه کې شوي دي.

د سرچينې په وينا حکومتي ځواکونو ته د "اورپکو" د شتون په اړه معلومات رسېدلي و او د ډزو په نتيجه کې لږ ترلږه اته "اورپکي" ووژل شول چې يو په کې مهم قومندان هم شامل و.

سرچينې وايي په دغو عملياتو کې د ۱۲ اورپکو له نيول کېدو سربېره د دوی دوه مرکزونه يې هم له منځه وړي دي.

ازادو سرچينو او يا په ډزو کې د وژل شويو کسانو ډلو تراوسه دغه خبر نه دی تاييد کړی.

سانګان او ورسره تړلې بولان له هغو سيمو دي، چې پر امنيتي ځواکونو او حکومتي چارواکو بريدونه ترسره کېږي.

ورته مطالب