'د وینې معاینې له لارې د زړه احتمالي حملې معلومول ممکن دي'

د انځور حقوق Thinkstock
Image caption ماهرین وايي، دغه معاینات خورا ارزان بیه دي

ماهرین وايي، د وینې یوې ارزان بیه معاینې له لارې اوس دا معلومیدای شي، چې په ظاهره یو روغ رمټ کس تر کومه حده د زړه په رنځ د اخته کېدو له خطر سره مخامخ دی.

ماهرین وايي د کولېسټرول او وینې فشار د معایناتو پرتله دغه معاینه د زړه په رنځ د اخته کېدو احتمال په کره توګه څرګندوي.

دغه څېړنه کې چې د برټش هارټ فاونډېشن په مرسته شوې، ویل شوي دي، په ټروپونن نومي دغه معاینه کې هغه پروټین لیدل کېدای شي، چې د زړه له ناروغو پلو وځي.

ډاکټرانو د هغو مېرمنو او نارینه وو دغه معاینات پیل کړي، چې فکر کوي د زړه له حملې سره مخامخ شوي وو. خو د اډنبرا او ګلاسګو پوهنتونونو څېړونکي وايي، دې سره وار له مخه د زړه د احتمالي حملې امکان معلومېدای شي.

څېړنه کې پروفېسور نکولس ملز او همکاران یې وايي، هغه کسان چې وینه کې یې ټروپونن ډېر وي د زړه په رنځ د اخته کېدو احتمال یې ډېر وي یا دا چې ښايي د زړه د رنځ له کبله ښايي تر راتلونکو ۱۵ کلونو پورې ژوند له لاسه ورکړي.

ماهرین فکر کوي، د کولیسټرولو لږونکې دوا ورکولو په وسیله کېدای شي د دغو کسانو په وجود کې د ټروپونن کچه لږ شي.

څېړنه کې داسې ۳۳۰۰ کسان شامل وو، چې د کولېسټرولو کچه یې لوړه وه، خو د زړه پر رنځ اخته نه وو. څېړونکي اوس غواړي پر ښځو هم دغه ازموینه وکړي.