بریتانیا کې یوه تي خوري ماشوم ته نوی زړه لګول شوی

د بریتانیا یوه روغتون کې یوه اته اونۍ عمر لرونکي تي خوري ماشوم ته نوی زړه لګول شوی، چې ډاکټران هیله ښيي د نوي کال په راتلو سره به له روغتون نه ووځي.

تېره میاشت، په ټوله اروپا کې د چارلي دوتریت د ژغورلو لپاره د مرستې غږ شوی و.

نوموړی په داسې حالت کې زیږېدی و، چې ایله نیم زړه یې جوړ و.

د هغه د زړه نیمه کیڼه برخه هېڅ نه وه، چې د نیوکاسل فریمان روغتون کې یې جراحي عملیاتو نهه ساعته وخت واخیست.

د هغه مور تریسي رایټ له هغې کورنۍ مننه وکړه، چې چارلي ته یې د زړه په ورکولو سره "بیا ژوند ورکړ":

"زما ماشوم ته یې یوځل بیا د ژوند کولو فرصت ورکړ، زه به تل د دوی منندویه یم".

"ډالۍ، چې ارزښت یې نه پوره کېږي"

نوموړې زیاتوي، له جراحي عملیاتو وروسته یې د زوی د پوستکي رنګ بیخي بدل شوی و، زیړبخون به و، خو اوس ګلابي رنګه شوی، چې دا د خوشحالۍ خبره ده.

Image caption چارلي ته یوې نومورکې کورنۍ زړه ورکړی

دا وايي: "داسې احساس کوم لکه دا کار چې معجزه وي. "

دغې مور د جراحي عملیاتو خبر پر خپل فېسبوکپاڼې لیکلی چې وايي: "ښه راغلاست، غوښتل مې خبر مو کړم چې چارلي نوی زړه وموند او هغه ته د زړه لګول پای ته ورسېدل. "

دا زیاتوي: "یوځای یوې ښکلې کورنۍ موږ ته داسې ډالۍ راکړه، چې هېڅ قیمت یې نه پوره کېږي".

دغې مور له یادې نومورکې کورنۍ نه په مننې وویل: "له تاسو ډېره مننه، هېڅ داسې توري نه لرم چې ستاسې مننه پرې وکړم. "

د ماشوم د اوسني وضعیت په اړه هغې لیکلي: "هغه اوس ښه دی، موږ ډېر ورته خوشحاله یو، دا زموږ کوچنی جنګیالی دی! ".

د چارلي د پرانیستي زړه عملیات هغه مهال وشول چې نوموړی ایله د درو ورځو و او وزن یې ۲٫۵ کیلوګرامه و.

د فریمان روغتون د زړه برخې ډاکتر زدنکا رانهارټ وویل: "د هغه د زړه حالت او اندازې ته په کتلو سره موږ نېکبخته وو چې عملیات کامیاب شول. "

ډاکټران هیله لري چې د راتلونکي کال په پیلېدو به هغه له روغتون نه په داسې حالت کې ووځي، چې روغ به وي.

په ۱۹۶۷ کال، د سوېلي افریقا کیپ ټاون کې د لومړي ځل لپاره یوه سړي ته د بل سړي زړه ولګول شو

داکتر کریسټیان برنارډ د ۵۴ کلن لویس واشکانڅکي عملیات وکړ، چې له عملیاتو ۱۸ ورځې وروسته ومړ.

ورته مطالب