"مريخ کې د اوبو جهیل موندل شوی"

د انځور حقوق Science Photo Library

ساینس پوهان وايي، داسې نښو سره مخ شوي چې د مریخ په سیاره کې د لوی حجم مایع اوبو شتون په ډاګه کوي.

دوی وايي، دا نوی موندل شوی جهیل د مریخ سویلي قطب تر کنګلونو لاندې دی او اوږدوالی یې ۲۰ کیلومتره دی.

مخکينیو څېړنو ښودلې وه چې ممکن د مریخ پر مخ اوبه موجودې وي خو دا لومړی ځل دی چې په دومره لویه کچه د اوبو د شتون نښې له دغې سیارې ترلاسه کېږي.

له دې مخکې د ناساڅېړونکي روباټ کیوریوسیټی د مریخ پر مخ د اوبو نښې او لارې موندلې وې او دا یې په ډاګه کوله چې پخوا د مریخ پر مخ اوبه وې.

خو له هغه راهیسې د دې سیارې یخې هوا له کبله دا اوبه تر ګنګلونو لاندې ایسارې پاتې شوې دي.

د انځور حقوق NASA/JPL/MALIN SPACE SCIENCE SYSTEMS

دا نوې موندنې د مارسیس په ذریعه ترسره شوې دا راداري تجهیزات دي چې د مارس اکسپرس ستور بیړۍ څېړونکی روباټ باندې نصب شوي دي.

د مارسیس په ډول رادارونه د څېړونکي روباټ د ستور بیړۍ په مخ او لاندې برخه کې نصب کېږي چې سیګنالونه او انعکاسونه ارزوي.

خو مارسیس دا توان نه درلود چې د دې سمندرګي ژوروالی معلوم کړي پوهانو د اټکل له مخې یې ژوروالي یو متر ښودلی.

پروفیسور روبرټو اوروزی وايي:" کولی شو دغه د اوبو لوی حجم د جهیل په کچه حساب کړو، یو سم جهیل، نه هغه اوبه چې د ګنګلونو له ویلي کېدو د ډبرې او کنګل ترمنځ ځای ډک کړي ".

د انځور حقوق ESA/INAF

د بریتانیا پوهاند منیش پټېل وايي،"له ډېره وخته مونږ په دې پوهېدلي یوو، د ژوند هغه ډول چې مونږه یې پېژنو په مریخ کې نه شته نو ځکه د دې سیارې تر سطحې لاندې د ژوند موندلو لپاره هڅې روانې دي "

"او دا هغه ځای دی چې تر ډېره له مضره شعاګانو خوندي پاتې کېدی شو د هوا فشار د یا ژوند کچې ته را لوړېږي او له هر څه نه مهمې اوبه دي چې یو حیاتي عنصر دی"