اقلیمي بدلون د حیوان لسګونه زره کاله پخوانی رسم له منځه وړي

رسم

د عکس سرچینه، Basran Burhan

د عکس تشریح،

د اندونیزیا یوه سمڅ کې پر ډبره د خنزیر کښل شوی یو انځور چې لرغونتوب یې ۴۵۵۰۰ کلونو ته رسېږي، د اقلیمي بدلون له کبله زیانمن شوی

څېړونکو په اندونیزیا کې پر ډبرینو هنرونو د اقلیمي بدلون د اغېز په اړه خبرداری ورکړی،‌ چې ګنې ښايي له منځه یې یوسي.

داسې وېره هم شته چې ګنې په سولاوسي ټاپو کې د یوه بېدیايي خنځیر کښل شوی رسم، چې د حیواناتو تر ټولو لرغونی رسم ګڼل کېږي او لرغونتوب یې ۴۵۵۰۰ (پنځه څلوېښت زره ۵ سوه) کلونو ته رسېږي، د ړنګېدو له ګواښ ‌سره مخامخ دی.

د سیمې یوه سمڅه کې دې ته ورته د ښکاري صحنو، او خرافاتي کایناتو نور رسمونه هم شته، چې د تودوخې د درجې لوړېدو سره ښايي د له منځه تللو له ګواښ سره مخامخ شي.

څېړونکي وايي چې ددې ارزښتمن انځور د ساتلو لپاره باید ډېرې هڅې وشي.

د یوې څېړنډلې مشره ډاکټره جولیان هانټلي وايي، دا هنري ټوټې زموږ په مخ کې د ورکېدو په حال کې دي.

استرالیايي او اندونیزیايي څېړونکو تېره اونۍ وویل چې د تودوخې د درجې لوړېدل او د پرله پسې وچې هوا او وچو بادونو په څېر د هوا نور حالات په هغو سمڅو کې د مالګینو موادو د ډېرېدو لامل ګرځي، چې پر ډبرو توږل شوي رسمونه پکې دي.

دغې څېړنډلې ویلي، مالګین مواد د حرارت له کبله اغېزمنېږي،‌ په ګرمو ورځو کې د نورو ورځو پرتله جیولوجیک مالګین مواد درې برابره ډېرېږي.

د ډبرینو رسمونو شا ته او پاس مالګین مواد ډېرېږي او د سمڅو پر دېوالونو کښل شوي او توږل شوي رسمونه ورسره ویلې کېدای شي.

ډاکټره هانتلي وايي، باوري ده چې "په نړیواله کچه د تودوخې د درجې په لوړېدو پر ډبرو توږل شوی هنر اغېزمنېدای شي".

د سولاوسي ټاپو په لینګ تیدونګنګ سمڅه کې موندل شوې د خنځیر ډبرین رسم موندل ددې ښکارندويي کوي چې ګنې هلته انسانانو هم ژوند کړی دی.

که څه هم دا یوه لرغونې هنري ټوټه ګڼل شوې ده، خو د انسان په لاس جوړ تر ټولو لرغونی اثر نه دی.

په سوېلي افریقا کې باور دا دی چې څه باندې ۷۳ زره کلن یو ګډوډ رسم شته، چې د نړۍ تر ټولو لرغونی رسم ګڼل کېږي.