راشد او نبي په یو ورځنیو لوبو کې غوره الرونډران شول

د انځور حقوق Getty Images
Image caption د افغانستان راشد خان او محمد نبي په ترتیب سره په یو ورځنیو لوبو کې د غوره الرونډرانو په لېست کې لومړی او دویم ځای لري.

د یو ورځنیو لوبو لپاره د کرېکټ د نړیوالې شورا وروستۍ درجه بندي،‌ چې نومبر میاشتې پر لومړۍ نېټه خپره شوه، ښیي چې د افغانستان د کرېکټ ملي لوبډلې دوه لوبغاړي لا هم د دې جدول په سر کې ځای لري.

د افغانستان راشد خان او محمد نبي په ترتیب سره په یو ورځنیو لوبو کې د غوره الرونډرانو په لېست کې لومړی او دویم ځای لري.

په درېیم ځای کې د بنګله دېش شکېب الحسن او څلورم ځای کې د نیو زیلنډ مېچل سنټنر دی.

د افغانستان دوه نور لوبغاړي، ګلبدین نایب په ۳۷م او مجیب ځدراڼ په ۵۸م ځای کې دي.

په ۲۰ اوریزو لوبو کې د افغانستان راشد خان له ۷۹۳ پاینټونو سره لا هم د نړۍ تر ټولو غوره توپ اچوونکی یا بالر دی.

په دویم ځای کې د پاکستان شاداب خان دی چې ۷۵۷ پاینټونه لري. همدا رانګه د ۲۰ اوریزو لوبو د الرونډرانو په لېست کې د افغانستان محمد نبي دویم ځای لري. یوازې د اسټرالیا ګلېن مکسوېل تر ده وړاندې دی.

د ملي لوبډلو په درجه بندۍ کې افغانستان په ۵۰ اوریزو لوبو کې لسم ځای لري، او د زمبابوې په څېر ټیمونو څخه لا هم مخکې دی.

انګلستان لا هم د ۵۰ اوریزو لوبو لپاره د نړۍ تر ټولو غوره لوبډله ده، او هند دویم ځای لري. په ۲۰ اوریزو لوبو کې بیا افغانستان اتم ځای لري، او د سریلانکا، بنګله دېش او زمبابوې په څېر لوبډلو نه لا هم وړاندې دی.

په ټېسټ لوبو کې بیا افغانستان د لېست د سر لسو لوبډلو کې ځای نه لري.‌

اړونده مطالب

ورته مطالب