د پاکستان کرېکټ سوپر لیګ کې شل پښتانه لوبغاړي وپېژنئ

  • عرفان خټک
  • کراچۍ کې ازاد خبریال
اپرېدی

د عکس سرچینه، PCB

د عکس تشریح،

شاهد اپرېدی د دې سیالیو تر ټولو مشر لوبغاړی دی

د پاکستان د کورني کرېکټ سوداګریزو سیالیو یا پاکستان سوپر لیګ پنځم پړاو ته شپږ لوبډلو بېلا بېل پښتانه لوبغاړي غوره کړي دي. په دې لوبډلو کې تر ټولو زیات پښتانه لوبغاړي کوټه ګلیدیئټرز نومې لوبدله کې اخیستل شوي دي.

د کوټې اوسېدونکی عبدالناصر، احمد شهزاد، محمد نواز، سهیل خان، انور علي او د کوز دیر نسیم شاه هغه پښتانه لوبغاړي دي چې دې سیالیو کې د کوټې لوبډلې لخوا اخیستل شوي دي.

ورپسې تر ټولو زیات پښتانه لوبغاړي ملتان سلطانز نومې لوبډله کې اخیستل شوي.

نامتو لوبغاړی شاهد خان اپرېدي، جنید خان، محمد الیاس، عثمان قادر او د بنو خوشدل شاه په لومړي ځل ملتان سلطانز نومې لوبډلې ته غوره شوی دی.

په درېیم ځای کې زیات پښتانه لوبغاړي د کراچي کینګز نومې لوبډله کې اخیستل شوي چې شمېر یې څلور دی.

ارشد اقبال، افتخار احمد، محمد رضوان او ځوان عمر خان هغه پښتانه لوبغاړي دي چې سږ کال به هم کراچي کینګز لوبډلې ته لوبې کوي.

د عکس سرچینه، PCB

د عکس تشریح،

د دیر نسیم شاه بیا د دې سیالیو تر ټولو کم عمره لوبغاړی دی

د پاکستان سوپر لیګ لاهور قلندرز نومې لوبډلې هم درې پښتانه لوبغاړي، فخر زمان، عثمان شینواری او د خیبر ایجنسۍ شاهین شاه اپرېدی خپلې لوبډلې ته غوره کړي.

خو جالبه دا ده چې د پېښور زلمي لوبډلې، چې تر ‌‌‌‌‌‌ډېره د پښتنو لوبډلې په نامه هم یادیږي، سږ کال یوازې دوه پښتانه لوبغاړي، عامر خان او محمد محسن خپله لوبډله کې اخیستي دي.

د پاکستان سوپر لیګ سیالیو کې ټولټال شپږ لوبډلې لوبیږي.

دا سیالۍ تر دې وړاندې په متحده عربي اماراتو کې ترسره کېدلې او ځينې لوبې به یې په پاکستان کې کېدلې.

خو دا لومړی ځل دی چې د ۲۰۲۰ م کال پنځم پړاو ټولې لوبې او ان پاېلوبه هم په پاکستان کې ترسره کېږي.