کرېکټ: افغان لوبډلې ايرلنډ په وروستۍ لوبه کې په ۳۶ منډو مات کړ
د عکس سرچینه، ACB
افغان لوبډلې ايرلنډ ته د يو ورځنيو لوبو د لړۍ وروستۍ لوبه کې په ۳۶ منډو ماته ورکړه او دغه سېريز يې ۳ـ۰ وګاټه.
دغه لوبه چې د متحده عرب اماراتو ابوظبۍ کې کېده، پچه يې ایرلنډ وګټله او لومړی يې د توپ اچونې پرېکړه وکړه.
د افغانستان ملي لوبډلې ټاکلي ۵۰ اورونه ولوبول او د ۹ لوبغاړو په سوځېدو یې ایرلنډ ته د ۲۶۷ منډو هدف وټاکه.
د افغانستان د سر درې لوبغاړي یو په بل پسې او نسبتآ یو څه ژر وسوځیدل او تر ۱۱۷ منډو بیا نیمه لوبډله سوځېدلې وه.
د افغانستان له اړخه تر ټولو ډېرې (۴۸) منډې راشد خان وکړې چې ۳ شپږېزې او ۳ څلوریزې هم په کې وې.
د نوموړي تر څنګ اصغر افغان ۴۱، ګلبدين نايب ۳۶، محمد نبي ۳۲ او رحمان الله ګوربز ۲۲ منډې وکړې.
د عکس سرچینه، ACB
د ایرلنډ لخوا توپ اچونه کې کرېګ ینګ او سېمې سېنګ هر يوه ۳ - ۳ افغان لوبغاړي وسوځول.
د ايرلنډ لپاره پاول سټرلېنګ د ۶ شپږيزو او ۹ څلوريزو په مټ تر ټولو ډېرې ۱۱۸ منډې وکړې.
د افغانستان په توپ اچوونه کې راشد خان څلور، مجيب ځدراڼ دوې، نوين الحق او محمد نبي يوه يوه وېکټه واخيسته.
د دې لوبلړۍ تېرې دوه لوبې افغانستان ګټلې دي.
د افغانستان د کرېکټ ملي لوبډلې لومړۍ لوبه په ۱۶ منډو او دویمه په ۷ ویکټو ګټلې وه.
د کورونا وېروس د وبا له پيل راهيسې په نړيواله کچه دا د افغان لوبډلې لومړی سېريز دی. دغه لوبې د ۲۰۲۳ کال يو ورځنيو لوبو نړيوال جام غوراوي کې مهم رول لري چې له ۱۲ لوبډلو به اته غوره لوبډلې دغه جام ته مخامخ لاره پيدا کوي.
