د اروپا په فوټبال اتلوليو کې کوم هيوادونه بخت ازمويي

دا د اروپا د فوټبال اتلوليو ١٤ مې سيالۍ دي چې په پولنډ او اوکراين کې ترسره کيدونکې دي
Image caption دا د اروپا د فوټبال اتلوليو ١٤ مې سيالۍ دي چې په پولنډ او اوکراين کې ترسره کيدونکې دي

کوربه هيوادونه اوکراين او پولنډ دغو سياليو ته بې له غوراوي غوره شوي وو ځکه چې په خپله خاوره يې دا اتلولۍ ترسره کيږي.

د نورې اروپا هيوادونو پاتې ١٤ ځايونو ته دوه کاله سيالۍ وکړې او لوى هيوادونه ټول په کې ځاى شول.

اسپانيا، جرمني، ايتاليا، انگلستان، فرانسه، هالنډ، پرتگال، يونان، د ايرلنډ جمهوريت، روسيه، کرويشيا، ډنمارک، چيک جمهوريت او سويډن د غوراوي له پړاوه تير شول.

اسپانيا د تيرو سياليو اتل دى، جرمني درې ځله، فرانسې دوه وارې، يونان او ډنمارک يو يو ځل د اروپا اتلولۍ گټلي دي.

چيک جمهوريت هغه مهال دا سيالۍ گټلې وې چې لا چيکسلواکيا وه او روسيې هم هغه مهال د اتل لقب خپل کړى و چې لا شوروي اتحاد وه.

د سږ کال په اتلوليو کې شامل ټول هيوادونه په څلورو گروپنو سره وېشل شوي دي.

په اې گروپ کې چيک جموريت، له يونان ، روسيې او پولنډ سره مخامخ دي.

په بي گروپ کې ډنمارک، جرمني، هالنډ او پرتگال سيالي کوي.

په سي گروپ کې تير اتل اسپانيا، ايتاليا، د ايرلنډ جمهوريت او کرويشيا بخت ازمويي.

او په ډي گروپ کې فرانسه، انگلستان، سويډن او اوکراين له يو بله د وړاندې کيدو هڅه کوي.

له هر گروپ څخه دوه هيوادونه دويم پړاو ته رسيږي.

دويم پړاو وارد واره د منځلوبو يا کواټر فاينل دي چې د هغوى گټونکي نيمه پايلوبو ته رسيږي.

ورته مطالب