ارسنل د انگلستان د ښځو فوټبال اتلولي بيا وگټله

د خپريدو وخت: 16:32 گرینویچ - دوشنبه 01 اکتوبر 2012 - 10 تله 1391
ارسنل

د ارسنل د ښځو فوټبال لوبډله د انگلستان تر ټولو پياوړې ده

د شمالي لندن کلب ارسنل په تېرو ١٢ کلنو کې په ١١ ځل د انگلستان د ښځو د فوټبال اتلولۍ خپلې کړې.

په تېرو ١٢ کلونو کې يوازې يو ځل د شمالي لندن ارسنل کلب د انگلستان د ښځو فوټبال اتلولۍ نه دې گټلي.

د دوى وروستى برى تر وروستۍ لوبې وړاندې ممکن شو.

د ارسنل د ښځو فوټبال لوبډلې روزونکې لورا هاروي وايي:

" هر کال زموږ هدف همدا وي چې اتلولي خپله کړو، نو له دې بري سره مو يوه بله هيله پر ځاى شوه."

په دويم مبر د برمېنگهم ښار و چې د ارسنل د اتلولۍ ځنډ ته يې بايد د بريسټل کلب ته ماتې ورکړې واى خو د دوى لوبه دوه په دوهم مساوي پاى ته ورسېده او په دې توگه د لندن کلب اتل شو.

دا نهم پر له پسې کال دى چې د ارسنل د ښځو فوټبال لوبډله د انگلستان د فوټبال اتلولي گټي.

د ارسنل د ښځو فوټبال کلب تر اوسه ١٢ ځله ليگ اتلولۍ گټلي، دوه ځلې يې د ښځو سوپر ليگ کپ خپل کړى دى.

دوى د ښځو د فوټبال فدراسيون کپ ١١ ځله او ليگ کپ ١٠ ځله ترلاسه کړى دى.

د ارسنل د ښځو فوټبال لوبډلې د لويو وچو اتلولي او د اروپا د ښځو فوتبال کپ هم يو يو وار گټلى دى.

د ارسنل د سړو لوبډلې په تېرو اوو کلونو کې څه نه دي گټلي خو په دغه موده کې يې څو پايلوبې بايللې دي.

د ارسنل کلب ملاتړي په دې هيله دي چې د ښځو اتلولي به يې پر سړو هم اغېز وکړي او سږ کال به يو نه يو کپ پورته کړي.

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .